雖然前一晚搞到好夜先有得瞓，但第二朝艾菲一早就較定鬧鐘爬起身，為咩？咪就係呢個咁靚咁綠嘅人工湖景囉﹗如果朝朝起身，打開窗行出露台就見到呢個view，真係人都特別醒神㗎﹗
燒腩仔瞓醒見艾菲行咗出去，都有跟住企喺到望咗陣風景，但就唔敢赤腳行出露台，然後一換好衫又開始上上落落咁sir滑梯啦﹗
夠鐘就出去遊戲房食早餐（親子房全部安排喺遊戲房食，大人可以邊食邊睇小朋友玩，又係好貼心嘅安排），左邊嘅係大人嘅九宮格早餐，有民宿自家種嘅蔬菜，好味到艾菲不自覺咁食咗兩碗粥，右邊係燒腩仔嘅早餐，都好吸引同好味㗎，但燒腩仔呢期腸胃麻麻，再加上個心一早飛咗去玩，所以食咗半塊麵包同飲咗杯豆漿就話唔食啦。
遊戲房鋪晒軟墊，就算帶較細嘅BB來玩都無問題，入面有大量圖書同各式玩具，燒腩仔仲喺到巧遇巧虎添﹗
至於艾菲就最鐘意呢套夢寐以求但一直唔捨得買嘅Hape廚房﹗即刻叫小廚神煮返幾味來食吓先﹗
喺遊戲房玩咗陣，米高就拉咗我哋出去遊湖，原來喺湖嘅另一邊望返去民宿，係咁型格㗎喎，湖邊樹蔭底仲好有心思咁整咗個韆鞦喺到畀人玩。
走之前去咗民宿新推出嘅姆明房參觀，個波波池同假沙池都好正呀﹗搞到艾菲勁想再來玩呀﹗
check out後就正式展開宜蘭嘅行程啦，呢日天氣係好到不得之了，亦令艾菲更加覺得四日三夜嘅台北宜蘭之旅實在唔夠玩，好多上山下海嘅活動今次都玩唔到，只能夠走馬看花式咁去D比較近嘅景點，感覺有D可惜呀...
離開民宿第一個景點就係去最就近嘅宜農牧場，基於燒腩仔係個安全系數相當高嘅小朋友，佢去到牧場見到咁多小動物，係唔會有一般小朋友嘅興奮反應，經佢觀察一輪後終於揀咗餵羊BB飲奶，不過佢本身有D驚又唔多識餵，餵餵吓突然放開手，畀隻羊擔走咗個奶樽，要我哋幫佢拎返先有得繼續餵。
餵完羊BB壯咗膽，跟住就好勇咁叫米高買草畀佢餵大羊，行到埋去仲好認真咁同D羊講「我買咗草畀你哋啦」，聽到艾菲忍唔住爆笑，不過佢餵咗陣又係突然放開手走佬，由D羊將成紥草擔走...
餵完羊本來心情大好，正當我哋準備帶佢去睇其他小動物時，呢一秒仲好興奮咁跟D哥哥一齊追住隻羊BB來摸㗎，下一秒已經唔小心成個人沿斜路直仆落地，艾菲當時企咗喺佢後面，睇見佢飛落斜路嘅背影同喊聲，個心真係離一離㗎，勁驚佢撞到隔離舊石有咩意外，好彩只係刮損手無毀容。
跌一跌之後就開始喊驚，咩都話唔玩兼全程屎面，咁小朋友唔玩咪大人玩囉，艾菲貪得意都買咗枝奶來餵豬BB，不過佢哋好似畀人餓咗勁耐咁，
臨走前玩埋門口個吊床，前前後後氹咗燒腩仔成十分鐘都有，先氹到佢上來兼望住鏡頭笑咋﹗
下一站去咗三星青蔥文化館，入面成個館都係介紹宜蘭嘅名物三星蔥。
不過艾菲此行嘅目的，並唔係想知三星蔥點種，而係想試吓呢杯三星蔥味嘅雪糕，對於有自己整開雪糕嘅艾菲來講，真係好有興趣想知蔥味雪糕會係點，畀錢之後就即刻打開來試，就咁用鼻聞係唔會聞到任何味，食落口先有淡淡嘅蔥味，個味有D似食緊凍嘅蔥油餅咁，確係幾特別。
三星除咗三星蔥，其實仲有上將梨，宜家呢個時候正值當造期，其實都想試吓好唔好味㗎，但四圍賣嘅都係禮盒裝一盒六個八個咁，我哋一家三口邊食到咁多，廢事浪費就無買來食啦﹗
Day 1 HK>宜蘭 part 1
Day 1 HK>宜蘭 part 2
沒有留言:
張貼留言