Miss I......vy's world: 新玩具

2015年7月27日星期一

新玩具

拖咗足足四個幾月，艾菲終於都要面對現實，帶咗呢個新玩具返屋企啦﹗Nikon D5500﹗正式由3系升級到5系﹗其實只係高階少少嘅入門機，操作上都係咁用，只係個touch screen同wifi搖控比較新，咁當然D色同對焦速度都比舊機進步咗好多啦﹗

舊機突然喺三月頭某日爆mon（只爆入面顯示位，出面無表面傷痕），當時艾菲真係傷心到不得了，皆因用咗佢三年幾就來四年，係最近呢一年先叫做越來越夾，同佢建立咗感情實在唔捨得換，但問過玩開相機嘅表弟同攝影師朋友意見，都係話整返要接近一千蚊，部機賣返出去已經唔值錢，勸艾菲換過第二部留佢做後備機算。

艾菲當時考慮咗兩日，買新機又無咩idea邊部好，見個mon唔係完全死晒，其他function亦無受影響，就決定繼續用住先等遲吓再算，仲帶埋佢去台灣旅行添，不過艾菲最近迷上用定焦鏡，對焦一定要好準先影得靚，影完相要偷窺咁放大逐格望或者拖到load落電腦先知out focus衰咗，對於艾菲呢D新手來講無咗個mon真係幾唔方便，於是趁上兩星期得閒就的起心肝去Nikon維修部走轉，confirm整mon價錢有機會過千，米高又應承接手舊機（感覺真係有D似賣仔咁㗎，嗚...），艾菲就決心買新機啦﹗

到底買咩機好？艾菲都頭痛咗幾晚，有諗過好唔好轉會用返Canon機（艾菲之前幾部DC都係canon），但考慮到轉會用唔返D鏡頭，同埋艾菲始終鐘情Nikon影出來嗰種實的的嘅色水，咁就ban咗轉會嘅念頭，然後第二樣嘢要諗就係買邊個level嘅機，畢竟用咗3系入門機一段時間，有無必要升呢呢？如果買返同系新機感覺有D無謂，但太高level嘅艾菲又未用得著兼夾太重帶出街唔方便，所以最終揀咗呢部5系機，升咗少少呢function多咗但重量size都同舊嘅差唔多，連埋燒腩仔D嘢一齊放喺媽媽袋到都OK，而慳家嘅艾菲今次仲只買body，用返舊機嘅kit鏡就算，寧願留返D錢遲D買枝長D焦距嘅鏡好過。