離家出走の火車博物館

星期六黃昏時份停雨後，個天似乎無再落雨嘅意慾，等艾菲仲諗住星期日一早起身同燒腩仔去公園sir滑梯，點知朝早一場大雨，打亂晒艾菲嘅計劃（一落雨就全日都無得sir啦...），唯有改變行程等下午停雨後去火車博物館睇火車。



一年後重遊火車博物館，燒腩仔唔再一舊飯，一來到已經即刻「嘩﹗火車呀」咁叫出來，不過叫佢影相就勁唔合作，要出動至愛燒腩仔婆婆先叫做好少少。>.<



叫佢停低影吓路軌相都唔肯，叫佢同艾菲手拖手影相更加係決絕地話「唔得」， 要艾菲面懵懵咁喺前面追住佢來影，假日已經人多仲要全程屎面，艾菲求其影到張對到焦又背景無人嘅就算﹗>.<



燒腩仔公公婆婆睇見都忍唔住幫拖，企喺艾菲後面同佢玩揮手，終於成功引到燒腩仔笑。



來張公公婆婆發功前後對比圖，有時真係不得不佩服佢兩老，總係有辦法收服呢個麻煩友，艾菲真係無咁好耐性來氹佢...



嗱﹗嗱﹗嗱﹗轉過頭又扮憂鬱啦﹗



燒腩仔：啦...啦...啦...我是火車歌王...



趁燒腩仔公公婆婆去洗手間，艾菲捉咗佢去自己好鐘意嘅紅磚牆到影相，但model勁不滿全程只顧擰歪面飲水...



睇埋呢個火車模型就走啦，不過有個小朋友勁惡，當公公見人多唔想同佢排隊玩時，即發脾氣逼公公就範，咁老人家當然唔想粒孫唔高興啦，但艾菲就要事後做衰人捉住燒腩仔訓話一輪。



玩完差不多四點正值下午茶時間，去咗寶湖街市試食新假期最近介紹嘅珞桐冰室，艾菲一家住咗大埔咁多年都唔知呢到有間餐廳，雖然佢個名叫做冰室，實際裝修係一D都唔冰室，只係街市入面一間大排檔格局嘅茶餐廳姐，坐唔會坐得好舒服，但食物絕對有驚喜，好彩帶埋燒腩仔公公婆婆一齊來可以食多D。

我哋一行四人叫咗個小食拼盤（有蝦多士，春卷，咖哩角，炸蝦卷同薯條），近期好hit嘅一口多士同埋千島風情pizza，另外叫咗個菠蘿冰畀扭眼瞓中嘅燒腩仔，食物全部都係即叫即整所以要等，但除咗菠蘿冰有D hea（早知叫凍檸茶就算），同蝦多士略嫌唔夠新鮮之外，其餘嘅食物都好得好掂，特別係個新鮮焗起嘅pizza好足料，一口多士都好脆同落足醬料，個麵包皮更加係估你唔到咁好味﹗



連呢個扭緊眼瞓嘅小朋友，明明喊晒口話要返婆婆屋企食蘋果（一出火車博物館就扭婆婆買蘋果畀佢），大大聲話唔同我哋食下午茶，一見到食物上枱都即刻反口，霸住D薯條同一口多士唔畀我哋食，仲食到成咀都係添呀﹗