呢日一早起身，求其買個麥當勞早餐，未八點就開車離開台北，向住野柳方向出發﹗由於我哋此行只得四日三夜，宜蘭去咗日半，留返喺台北嘅時間實在唔多，艾菲原先係想帶燒腩仔坐火車去十分，行返爸爸媽媽九年前來拍拖時行過嘅路，但搵料時無意間畀艾菲搵到一個更想去嘅地方喎，於是就放棄咗十分嘅行程來咗呢邊，起初都擔心自己有無揀錯，不過當我哋架車來到海邊嘅時候，艾菲就知自己嘅選擇係絕對正確，呢到真係好靚好舒服好有放假feel呀﹗
來野柳呢邊當然係為咗睇石啦，不過唔係睇地質公園D石，而係睇山上面朱銘美術館D石雕，點解咁想來呢到？一來當然係因為之前未來過啦，二來就係之前朱銘喺藝術館做展覽時艾菲無綠去睇，三來唔多唔少因為睇咗《撒嬌女人最好命》，四來係知道呢到有嘢啱小朋友玩，艾菲同米高都無咩美術天份，亦睇得出燒腩仔無呢條根，不過氣質係可以慢慢培養嘅，畫唔出做唔到唔緊要，至少學會欣賞都好吖﹗
美術館十點先開門，我哋九點半已經來到，喺出面曬住乾等時燒腩仔D玩前恐懼症就突然發作，好不安咁又話肚痛又話唔想入去要走咁（事後睇返佢當時叫肚痛可能係有少少水土不服），入到去又有D驚D軍人石雕，連叫佢企隔離影張相都要半逼半氹先影到，好彩入面地方夠大，叫佢喺斜路到跑返陣，好快就正常返。
沿路行咗陣，好快就見到呢部機，賣咩？之唔係NT20一盒嘅粉筆囉﹗呢個係艾菲來呢到嘅最主要目的，所以一見到就即刻叫米高畀錢燒腩仔買，小朋友傻更更咁都唔知自己買咗咩，有得入錢買嘢已經好開心。
美術館嘅路上畫咗一格格，其實係親子塗鴉區，可以畀小朋友同父母用粉筆來親子創作，不過燒腩仔就嫌D粉筆污糟，求其撩咗幾筆就話唔畫，我哋當然無咁易放棄啦，連平日火柴人都懶畫嘅米高，都盡力畫D嘢來吸引燒腩仔，講到口水乾先氹到佢拎起個掃試掃咗幾吓（真係幾吓），然後再講佢已經開始爆喊，唉...
眼見其他小朋友都畫得勁開心，燒腩仔就畫到爆喊，呢吓真係令艾菲有少少失望，不過都明佢係個感統好敏感嘅人，需要畀其他小朋友更多時間先適應到新質感新事物，又或者係我哋唔識引導佢掛，但最神奇係之後行到去兒童藝術中心出面幅水畫牆時，艾菲無理佢只係自己走埋去畫吓畫，佢又居然自己走埋來畫埋一份，仲玩得勁開心喎﹗
畫完水畫，我哋就放咗佢落水池到盡情嬉水啦﹗
玩到水花四濺超勁hyper咁，之後仲學人去泵水，但就學極都唔識一吓一吓咁泵囉，kakaka...
喺到玩水玩咗一個鐘左右，見佢都開始有D疲態，我哋就叫佢換衫走啦，點知換完衫水池隔離個噴水池先開喎﹗其他小朋友即刻衝晒埋去玩，好彩燒腩仔無扭計話玩咋﹗（我哋只得一套後備衫，再玩就要光豬玩㗎啦）
換好衫就同佢行落太極廣場，咁大個草地，唔係唔跑吓嘛？
有兩層樓高嘅「太極拱門」。
有燒腩仔都識做嘅「單鞭下勢」。
仲有呢個「推手」。
呢個草地真係好大好舒服，可惜來到呢個位時個天忽然有少少陰，所以都唔係好影到D咩靚相。
之後行吓行吓去咗科學園區，由於有團自由人喺到，所以都無心機慢慢睇，只係見到個湖中心有條灣灣地嘅路幾靚，就叫燒腩仔喺到來回跑來畀艾菲影吓相，點知跑到第二轉時佢唔小心叉錯腳跌咗落水搞到成褲泥，O...
我哋沿藝術長廊行返出去，側邊又放咗D石雕喺到，呢D終於生活化D唔再係軍人咁沈重，而其中一個石雕係「父子」，艾菲一見到就即刻推米高同燒腩仔埋去扮，但呢兩父子一D都唔入戲囉，一個嫌個仔重，一個就顧住笑唔肯擺隻手出來扮飛。
上完條大斜路，我哋就到咗入口附近個湖，見有D姐姐喺到餵魚我哋又埋去望吓，畀米高見到部賣飼料嘅機，NT10一筒咁平就買咗兩筒畀燒腩仔試吓餵，我哋一餵D魚就即刻衝晒埋來，個畫面都幾震撼，難得燒腩仔又一D都唔驚喎﹗
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
Day 2 宜蘭>台北 part 2
沒有留言:
張貼留言