點知...平日勁少出街，亦好少去公園嘅表妹，全程喊驚兼皺眉，連佢最愛嘅米高都出動埋（表妹平日見到佢就會笑到冧冧豬咁樣），佢依然係唔肯笑，O...
表妹喊驚唔願玩，就由燒腩仔代表放電啦，我哋去咗近政府診所個公園玩，但有D小朋友喺到霸住晒D嘢，燒腩仔想玩個軚盤都要爭餐懵先輪到佢，玩到佢勁勞嘈咁款。
既然玩得唔開心就同佢轉場，拉隊去咗近巴士站個公園，D設施BB D啱學緊行嘅表妹多D，不過就輪到呢個表哥仔唔合作，硬要同表妹爭嘢玩兼阻住媽媽鏡頭，點都唔肯放艾菲去影表妹... >.<
唯有叫米高捉佢上底褲韆鞦等佢無得搞搞震啦﹗飛呀...笑到咔咔聲咁，完全想像唔到佢曾經一上韆鞦就爆嘁。
至於表妹，坐上去後都喊咗一輪㗎，但喺四個大人嘅努力下（四個大人服侍一個細路，之所以艾菲話佢係出巡啦，kakaka），最終都成功幫佢克服咗，後尾仲玩到笑添﹗
因為book咗枱夠鐘食飯，我哋玩咗大半個鐘就離開公園去開餐啦，呢餐食海鮮，有魚，蝦，蟹，扇貝，瀨尿蝦，聖子同鮑魚，另外仲有成隻雞添，全部海鮮都係燒腩仔姨丈托朋友去揀，然後運過來餐廳加工，所以特別新鮮惹味﹗
不過呢餐畀艾菲最深印象嘅，唔係D超鮮甜海鮮，而係table manner真係要由細教，燒腩仔自識坐之後，每次我哋出街食飯艾菲都一定要佢自己坐BB凳，坐到我哋大人食完嘢佢先有得走，喺艾菲印像中佢係從來無扭過走/抱㗎（扭食就多），每次只要我哋畀D玩具或者少少飯粒佢，佢就會乖乖坐定等我哋叫走先走，但今次表妹就扭得好勁，不斷要燒腩仔姨媽放佢出來，最後要燒腩仔婆婆抱住先肯收聲，艾菲都明佢會咁係因為少出街食飯，亦因為平日見得媽媽少兼知道媽媽唔忍心先會特別扭（平日主力姐姐同公公婆婆湊），但佢咁扭一扭就兩個大人陪佢一齊無啖好食，真係有D掃興呀﹗
沒有留言:
張貼留言