離家出走の大埔海濱公園

啱啱個星期六日，米高又走咗去日本風流快活（實情係出trip啦 :P），不過艾菲都唔輪蝕，星期五接埋燒腩仔放學，就執包袱返娘家度假，實行你有你玩，我有我hea﹗



只可惜天公不造美，成個星期都keep住落雨，基本上都無咩邊到去到，好彩等到黃昏時份終於停雨，就近近地約埋表妹一齊去大埔海濱公園玩。



大埔海濱公園有遊樂場，又有勁多影相位，不過我哋一行六人有老有嬾，而且啱啱停雨遊樂場實玩唔到，所以求其喺大草地玩吓草吹吓泡泡，睇吓D叔叔放風箏就算。



上咗兩堂幼兒水上安全班，教練教極燒腩仔合實嘴吹氣佢都做唔到，所以今次決定收起枝泡泡槍，畀返枝最傳統要用口吹嘅泡泡佢玩。



呼～呼～呼～



有圖有真相，D泡真係佢自己吹㗎﹗



表妹仲細未識吹泡，連拍泡都未係好曉，唯有玩吓樹葉啦﹗其實佢克服到行草地，艾菲已經覺得佢好叻﹗



之後諗住叫呢兩表兄妹一齊坐吓草地溫馨吓，點知兩個都扭到七彩勁唔合作，不過一畀把芭蕉扇佢哋就收晒聲，港孩到呢... >.<



一拎開兩把風扇，叫佢哋伸手拍吓泡，即刻九秒九變晒屎面﹗



見兩隻小魔怪開始有D失控，就決定轉場去回歸塔行吓，燒腩仔有得暴走當然高興，但表妹一畀姨
媽放上BB車，即喊到拆天，O...



回歸塔頂可以望到吐露港嘅風景，都幾舒服㗎﹗



之後帶咗燒腩仔去艾菲想當日同好姊妹談心嘅靚位（其實就係塔下面凸出來嘅望海位），佢又出奇地合作肯擺晒pose畀艾菲影喎，仲一臉期待成個少男的祈禱咁嘅樣添，kakaka...



玩到太陽落山我哋就走啦，簡簡單單又一個星期六，只要一家人喺埋一齊，就算hea住過都係開心嘅。