來到行程嘅最後一日，我哋終於留返喺台北做遊客無再四圍出走啦，呢朝一起身就去咗上引水產朝聖，我哋九點已經到但立食區原來十點半先開，因為有下場所以決定唔等，喺超市買D刺身壽司同蠔出外面食就算，期間有個小朋友不停扭食，基於佢太細唔食得生嘢，我哋只可以畀蛋同龍蝦壽司佢食，不過佢企喺到摞又伸唔到手埋來搶個情境（外面食嘢張枱比較高），就搞到我哋好似蝦細路咁囉... >.<
食飽就直接坐的士去華山文創園區，呢日嘅天氣實在係超好，後來睇返天氣報告先知最熱時有成36度，真係好彩宜家艾菲個袋常備巴蕉扇旁身。
一落車就見到好大個小丸子喺到迎接我哋啦﹗YEAH！
喺香港出發前見到台北有「櫻桃小丸子學園祭—25週年特展」，艾菲已經同米高講明要預半日去睇，雖然艾菲唔係小丸子嘅die-hard fans，不過讀書時都成日睇小丸子㗎，仲會儲麥記D小丸子玩具。
我哋來呢日係星期日，仲要係展覽開始後第二個星期，所以場入面超級熱鬧，都等咗一陣先買到飛入場，然後一入門口又見到大大個小丸子企咗喺到啦﹗
大門口嘅另一邊有小丸子同成班同學企喺頒奬台，仲有小丸子一家以盛裝現身，不過由於場內實在太多人，再加上燒腩仔唔太識小丸子全程搞搞震，所以想埋去影張似樣D嘅相都難。
喺門口位排咗一輪隊等吸紀念印章（前面個個都拎十張八張來吸，又吸得勁仔細對晒位咁，條隊去得勁慢，所以吸咗兩個之後艾菲都放棄啦），之後就到場景區，有齊小丸子屋企嘅每個角落。
剪頭髮剪衰咗嘅小丸子，影相條隊又係超級長，艾菲求其路過趁無人影張即閃。
而另一邊就有艾菲最鐘意嘅爺爺同小丸子呢個搞笑組合。
咁當然都有小丸子入面嘅其他角色啦﹗艾菲都好鐘意野口同學㗎，每次聽到佢嘅笑聲都會忍唔住笑﹗
穿過商店街之後就會見到爺爺心之俳句。
呢個燒腩仔入場時唔知嫌多人定嫌熱（場入面D冷氣確實唔多夠），扭咗勁耐話唔影相，正當艾菲完全無諗住理佢時，佢就忽然主動話要同小丸子影相，見班房門口呢個小丸子條隊唔太長先畀佢影咋，埋到去仲要懶friend咁摸住小丸子個頭來影囉﹗
離開班房就到學園祭運動會呢個場區，好多人都會埋去一齊扮跑同扮扯大纜，不過艾菲就嫌背景實在太多人，所以只影公仔就算。
嗱﹗嗱﹗嗱﹗燒腩仔又走埋去同山田同學扮friend啦﹗
去埋對面夏日夜晚祭典區，有日本祭典成日見到嘅攤位遊戲畀大家角色扮演，不過燒腩仔就只係顧住偷粟米食，其他連埋去望吓都唔肯，同著晒和服嘅爺爺影張相就走啦﹗
跟住係小丸子手稿區，仲有作者張工作枱添，但我哋湊住已經有D失控嘅燒腩仔，係完全無時間慢慢逐張欣賞。
最後係小丸子慶祝25週年嘅25個不同造型，隔離亦有花輪同學嘅造型大晒冷。
不過燒腩仔最有興趣嘅，係呢架花輪同學嘅跑車，都排咗陣隊先影到，但埋位先發現佢太矮喺前面完全影唔到佢，但喺側邊艾菲枝鏡又唔夠wide影唔晒...
離場之後會見到cafe同shop，cafe有小丸子鳳梨酥同小丸子頭西瓜雪條賣，不過我哋下一站已經係去食lunch，米高怕燒腩仔唔肯食正餐就唔畀艾菲買，唯有買呢個一早target咗嘅紀念杯就算。
趁燒腩仔有杯嘢飲鎮壓住，艾菲即刻衝入shop逛陣，雖然入面D嘢確係好靚好吸引，但基於艾菲明知自己買咗都唔會捨得用，最終好忍手咁只係買咗呢張可以變身吊飾嘅post card。
其實小丸子個場館對面就係Miffy展，鐘意Miffy嘅朋友可以去望吓呀﹗
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
Day 2 宜蘭>台北 part 2
Day 3 台北>野柳>台北 part 1
Day 3 台北>野柳>台北 part 2
沒有留言:
張貼留言