33個月

話咁快我就33個月大啦，雖然呢個月同爸爸媽媽坐咗飛機去台灣旅行，但其實我一直keep住病，由月初普通感冒咳到嘔，到月中成日叫住肚痛又痾唔出，終於拖到去完旅行返來連燒三日，痾同嘔咗幾次食埋抗生素，先終於正式好返，連媽媽都話餵我食藥餵到怕呀﹗



因為病同肚仔唔舒服，所以呢個月食得差咗，好多時食半碗就叫飽，試過連至愛嘅蛋糕同蛋壽司都話唔要，爸爸媽媽知我唔舒服都無勉強我，但宜家好返就開始加返份量畀我，肚餓時我都會搶住食，但無再好似上次腸胃炎之後咁餓鬼mode。

瞓覺方面無咩特別轉變，依然係晚晚十點半入房，搞到十一點幾差唔多十二點先肯瞓，但可能夏天陽光猛D，成日九點就會自己醒（之前可以瞓到十點㗎﹗），不過媽媽話有樣嘢值得一讚就係我試過兩次半夜醒咗，肯起身過隔離房叫醒媽媽話去廁所（之前係寧願賴喺片都唔肯出房），佢叫我要繼續努力，咁就可以開始戒埋夜片㗎啦﹗至於晏覺都係keep住放學返來瞓一個鐘，好唔夠喉所以每次起身都要發一輪脾氣先清醒到，就算媽媽用貼紙奬勵計劃都無咩改善。



活動能力無特別進展，行路時依然係成日跌，媽媽同老師商量過，已經決定暑假會同我約個期返健康院跟進吓，其他爬高爬低跑跑跳跳都無問題，今個月仲學識咗自己用水袖踢腳撥手游水添，來緊媽媽又會同我去上幼兒水上安全班啦，希望今年大個仔會學到多D嘢啦﹗至於小肌肉方面，搓泥膠同扣鈕有明顯進步，畫線畫圓圈都越來越smooth。



認知能力越來越好，好多嘢講一次就記得，亦會留意到D好細微嘅嘢，呢個月爸爸媽媽開始教我認英文細階字母同一D簡單英文單字，大部分都係一學就記得，係b,d,a,p,q呢D相似嘅會撈亂，宜家終於肯認真慢慢數數，認數字亦越來越好，出街認巴士號碼都少咗出錯。

空間感有明顯進步，砌砌圖已經唔會亂來，之前媽媽睇《天下父母心家長手冊》，學咗用lego訓練我嘅空間思維，我好快已經跟到砌到，呢排繼續熱衷於玩LEGO，喺姨丈嘅引導下學識自己砌架大貨車同高樓大廈出來。



好鐘意同小朋友玩，去到公園會主動撩D大哥哥大姐姐玩，人哋唔睬我就喺後面跟住佢哋做一模一樣嘅嘢，畀媽媽話過之後，宜家對同學會斯文D，識得有商有量少咗出口鬧人，對表妹都好返D，大家終於有交流肯輪流玩，但玩到興起時仍然會有失控嘅情況出現，有次就玩玩吓突然拎個玩具扑表妹個頭，嚇到媽媽同婆婆死。

自理能力keep住無退步，返學放學依然係自己換校服同揹書包，宜家已經著得越來越順，媽媽只需將D衫分好前後放喺到，同除衫時幫手反起件衫，我就可以自己換好衫，至於potty training都已經好穩定，so far呢個月係無意外發生過，由起身開始就除片到夜晚瞓覺先包返片，出街見到廁所會主動話要vee，就算去旅行期間都無失過手。



把口完全唔識收，日日由朝早起身就講到夜晚瞓覺，就算媽媽已經唔應我，我都可以繼續自己講唔停，甚至夜晚瞓覺要媽媽話「你再講嘢我唔陪你瞓」先肯收聲瞓覺，仲成日周街跟人口水尾亂講嘢，最鐘意就係學埋D話人嘅說話，搞到媽媽好頭痕要事後同我講一大輪道理，不過有時講D嘢都好sweet㗎，氹到媽媽勁開心，佢話要寫低畀大家睇喎...

事例一：

有日媽媽一早出去忙私務，要爺爺嫲嫲代湊我返學，到放學就由媽媽接返

媽媽：你頭先返學有無落雨呀？
燒腩仔：有呀，有好細雨呀！
媽媽：我今朝出門口時好大雨呀！整到成身濕晒！
燒腩仔：咁你著我件雨褸咪得囉！
媽媽：你件雨褸我唔啱著喎！
燒腩仔：咁我買件好大嘅畀你著啦！我問爸爸拎錢買畀你咪得囉！
媽媽：好呀...多謝你呀﹗ 

（艾菲：有心買件雨褸畀媽媽已經夠sweet，最醒係識得問爸爸拎錢買嘛，kakaka...）

事例二：

有日準備坐車去公公婆婆屋企時

媽媽：平時坐車都係你瞓，不如今次俾我瞓，落車你負責叫我起身啦，我今日好眼瞓呀！
燒腩仔：哦，咁你瞓我膊頭啦，咪唔使瞓得咁辛苦囉！
媽媽：嘩﹗你肯借個膊頭畀我瞓呀？多謝你呀﹗媽媽好感動呀﹗
燒腩仔：係呀，咁你咪唔使瞓得咁辛苦囉﹗
媽媽：咁你負責叫我起身得唔得？
燒腩仔：得﹗
媽媽：咁你知唔知邊到落車㗎？
燒腩仔：上樓梯到嘛（落車個站的確係有條樓梯上天橋）
媽媽：好啦，咁我一陣安心瞓㗎啦﹗

（艾菲：呢一刻真係覺得呢個仔好man囉﹗）

事例三：

去旅行喺機場check in完，爸爸媽媽商量緊食咩嘢

爸爸：你想入閘先食定出面食？
媽媽：都係嗰D嘢姐，不如出面食啦﹗
爸爸：咁一係翠華一係大家樂...
燒腩仔：喂﹗唔好食住呀﹗坐飛機先食呀﹗飛機有得食㗎﹗
爸爸媽媽：！＠＃＄﹪

（艾菲：我哋好似無人同佢講過飛機係有嘢食㗎喎）

事例四：

去茶餐廳食嘢時，媽媽叫咗杯熱檸茶，爸爸就叫咗杯可樂

燒腩仔：（指住媽媽杯檸茶）E...我唔飲肥叔叔（艾菲個中醫）D藥呀﹗
媽媽：好呀，你記得唔好飲啦喎﹗
燒腩仔：我飲爸爸嗰杯
媽媽：其實爸爸杯先係肥叔叔D藥，毒藥來㗎，你千祈唔好飲
燒腩仔：咁我飲返你呢杯
媽媽：乜我有話過請你飲咩？


最後又到講情感發展啦，媽媽話我呢個月忽然變得可愛咗，少咗搗亂唔合作，返學放學對媽媽來講終於唔再係苦差，依然在意爸爸媽媽開唔開心，只要聽到佢哋話會唔開心，我就會聽話唔再搞搞震，但有時太攰或者唔舒服都係會失控，仲會剩機拎D玩具或者死物來發脾氣。

不過鬧情緒嘅情況多咗，出街去玩前會因為怕唔知發生咩事而扭，到玩完要走又會因為唔捨得而唔高興，好多時大人做D嘢唔順我意，我會怨鬼纏身咁邊行邊喊，要媽媽惡話先肯收聲，次次明知自己做錯都唔肯接受懲罰，企圖以喊聲來擊退媽媽，但每次都畀佢罰得更甘...

成日做管家管返爸爸媽媽轉頭，會找佢哋嘅錯處，例如話媽媽食飯唔扶住個碗，同話爸爸坐扶手電梯時棟高腳，同埋畀媽媽話我是非精上身，出街或者返學見到其他小朋友唔啱嘅嘢，會第一時間向大人匯報，不過自己唔好嘅嘢就絕口不提囉﹗

～～～～～～～～～～～～～～～～～～～～～

嘻...唔好嘅嘢無謂講啦，不如我偷偷地送幾張相畀大家睇吖，媽媽因為我發燒而錯過咗NT大師嘅靚媽攝影團，於是等我一退燒就即刻拉我落公園影相補數，佢話practice makes perfect，雖然呢幾張相都仲係未OK，要靠後期加工先救得返，但練多D總有一日會成功咁話喎，咁媽媽你繼續加油慢慢摸索啦，記得影相還影相，千祈唔好逼我擺pose阻住我玩呀﹗