食完雪糕就離開三星，去咗羅東林業文化園區，但我哋泊好車之後無即刻入去玩，而係去咗對面好出名嘅林場肉羹開飯，據講weekend多人時要排好耐先有得食，好彩我哋呢日係星期五，所以一入去就有位。
餐廳無冷氣，門口就係爐頭，加埋當日正午時間三十幾度嘅氣溫，真係熱到艾菲唔多頂得住，不過燒腩仔居然出奇地無投訴，仲要好快手咁掃晒成碗飯話好好味喎﹗碗肉羹感覺有D似香港嘅碗仔翅，可以撈飯，麵或者米粉食，味道都唔錯，但如果環境無咁熱肯定會更好味囉﹗
食飽去對面停車場買杯西瓜汁就入去園區啦，呢個小朋友全程只係顧住搶嘢飲，一唔畀就死摞，之後見到有D放木材嘅位幾靚想叫佢入去影吓相，佢就喊晒口唔肯入去，講多兩講直情喊咗出來添，搞到大家都勁無癮。
兩母子講咗輪數，加埋米高喺側邊鼓勵，終於幫佢衝破心理障礙，埋去摸咗D木兩吓就走啦（因為燒腩仔實在太多嘢驚同唔肯試，所以我哋唔想畀佢乜都話驚就唔做，佢越話驚嘅嘢我哋越要佢去試），然後行咗入去見到呢條遊湖嘅木道，呢個背景用來影相真係一流，可惜艾菲個model心情不佳，所以求其叫佢來回行一次就算。
行完木道，終於見到來呢到嘅目標火車頭啦﹗車迷心情即時回復正常，為咗衝埋去架火車到，行路軌行得勁開心﹗
呢到好似火車博物館咁，放咗兩架蒸氣火車喺到，一架係展現以前運木嘅情況，另一架就已經變成咗cafe，車卡入面有D位畀人坐低飲杯嘢，都幾有風味㗎。
而火車對開就係貯木池，不過比艾菲想像中少木喎，之前睇人哋D相係好多木㗎﹗
喺羅東林業化文園區hea咗一個鐘左右，我哋就向住宜蘭火車站出發，架車本來泊咗喺幾米廣場，諗住沿路行返去火車站，但燒腩仔喺就到時忽然叫肚痛，我哋唯有先去宜蘭火車站同佢搵洗手間，然後調返轉頭行，但有人poo唔到加扭眼瞓，經過呢個丟噹噹森林時竟然好寸咁同艾菲話唔想影相，Fine! 唔影就算﹗
不過呢...眼瞓係敵唔過㩒機嘅吸引力嘅，行返去幾米廣場嘅路上，放咗部賣宜蘭風景同幾米明信片嘅機，我哋一叫燒腩仔幫手㩒機佢就即時復活，再畀佢親手放落郵筒就更加高興啦﹗
艾菲買咗兩張幾米明信片寄畀自己同燒腩仔婆婆，左邊張仲係音樂明信片，入面有隻CD連住，初時都有掙扎過好唔好抽起隻CD先寄，後尾決定放膽一試，結果張明信片連CD一星期後已經完好無缺咁寄到來屋企信箱啦﹗原來佢哋D工作人員會幫手貼郵票（明信片費用已包郵費）同封口，又真係幾good喎﹗
寄完明信片就拿拿聲襯燒腩仔仲清醒時去幾米廣場影相。
起初都係屎面多㗎，後尾玩吓玩吓開始肯笑啦﹗
之後見到呢個位幾靚，諗住同佢影吓相啦，但講到口水乾佢都唔肯笑，然後有個台灣EE路過笑佢扮憂鬰，雖然聽唔明不過都知人話緊佢，即刻扮
食飽就開車準備返台北啦，燒腩仔一上車就瞓著咗，而為食嘅艾菲就剩機摞米高兜一兜路去頭城，試埋呢杯阿宗芋冰先走，NT$40一杯有三球，艾菲揀咗芋頭，紅豆同紫米，口感好似食緊好棉密嘅雪芭咁，但估唔到最好味嘅係紫米，反而最出名嘅芋頭唔係太食到芋頭味。
食完芋冰就上高速返台北啦，點知遇上大塞車，原先一個鐘嘅車程，我哋塞咗兩個鐘先到，再加埋台北D路有D亂，都搵咗陣先去到米高想泊車嘅停車場，搞到七點幾八點先到酒店check in，今次我哋揀咗住新驛旅店台北車站二館，由於遲咗book只係得返最基本嘅雙人房，好彩我哋行李少得一個喼，加埋BB床都唔覺逼。
米高book房時已經request咗BB床同浴盤，不過上到房時唔見，要追先有職員幫我哋準備。
放低行李就拿拿聲坐捷運出去饒河街夜市搵食啦﹗小朋友瞓咗兩個鐘晏覺係特別醒神同合作D嘅﹗
來饒河街最主要嘅目的係要陪米高去食排骨酥，雖然台灣炸雞排出名D，但米高始終鐘情排骨酥多D，艾菲就最懷念呢到嘅芒果牛奶冰，今次仲試咗波媽推介嘅生蠔哥，果然係平靚正之選，而最爆係排隊點菜時，燒腩仔又忽然叫肚痛要去洗手間，我哋唯有問生蠔哥個阿姐，佢一聽到係小朋友要去洗手間，即刻勁好咁搭膊頭叫對面足浴鋪個姐姐借個洗手間畀燒腩仔，如果唔係真係唔知去邊變個洗手間畀佢poo啦﹗
宜家大個仔唔使再食BB餐，去到夜市咩都可以跟我哋照食照飲，但為咗唔想佢飲咁多西瓜汁，艾菲專登買咗杯蜂蜜苦瓜汁過佢歎，佢試咗一啖之後有話要飲返米高杯西瓜汁㗎，但我哋唔畀佢都肯照飲苦瓜汁，果然之前同佢睇中醫嘅苦茶訓練係有用㗎﹗嘻...
由於第二朝又要晨早起身趕路，所以同佢食飽玩陣車仔，就要趕返酒店休息啦﹗
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
沒有留言:
張貼留言