before sunset＠鯉魚門

難得燒腩仔燒咗三日之後，到星期五終於退燒，所以上星期六見米高下午得閒又好天，就決定帶佢出去郁動吓呼吸吓新鮮空氣，不過艾菲唔想一下子畀佢去公園玩得太癲，於是揀咗去鯉魚門望海睇日落。



我哋hea吓hea吓搞到六點左右先到，好彩太陽仲未落山，本來都有諗過叫米高帶我哋行去後山石屋（我哋當日影結婚相個位），不過見咁多雲應該睇唔到D咩，所以求其喺燈塔位同佢望吓海就算，起初都只係得D情侶同釣魚嘅叔叔喺到，之後就陸續有好多龍友來霸位影日落。



小朋友嘅開心來得特別簡單，睇叔叔玩飛航拍攝，將部直昇機飛來飛去都可以笑到咔咔聲。



之後同咗燒腩仔去後面公園仔玩，拎咗新買枝電動泡泡槍來試玩（唔多OK所以唔介紹啦），點知呢個小朋友對拍泡竟然零興趣，自己直衝咗上去玩滑梯。



無興趣拍泡但有興趣玩槍，研究咗一輪終於成功吹到泡泡出來﹗



YEAH！我得咗啦﹗



行返出去有跳飛機玩，即刻叫熱咗身嘅燒腩仔埋去跳吓，佢又真係識跟住D數字順次序跳喎﹗



離地港孩？？？



次次跳完右邊都要跳埋左邊個圈先肯返去由頭再跳。



一場來到，點都叫佢影返張睇海鮮相啦，但呢個小朋友個樣不屑到呢...



臨走去咗體育館借洗手間，米高見playroom唔使排隊，所以放佢入去玩咗陣，不過有班大哥哥同大姐姐喺到追逐，燒腩仔一見到就勁開心咁跟住佢哋走，人哋完全唔睬佢無同佢玩，但佢見人做乜就跟住做，大哥哥大姐姐拎起D cushion一齊掟向暱喺船入面個人佢又照跟，搞到我哋要捉返佢出來冷靜，宜家成日去公園都係咁，仲試過跟人走咗去添，真係睇少眼都唔得呀﹗