難得來到宜蘭羅東，梗係要去羅東夜市見識吓順便醫肚啦，一般台灣夜市都有嘅嘢食佢哋都有，我哋循例都叫咗小熊燒，花枝丸同呢期都幾hit嘅骰子牛來食，另外艾菲仲試咗個好足料嘅蚵蛋包，不過啱啱炸起勁辣口唔太食到味，至於個三星蔥肉串就真係超好味，香口得來又好juicy，不枉我哋喺高溫下排咗半個鐘等食。
至於燒腩仔呢...唔知係唔係嫌熱又唔太知我哋來做咩，初頭不停發忟買咩畀佢都話唔要唔食，仲行行吓扭米高抱，即你大少熱大人抱住你都好熱㗎喎，米高終於頂佢唔住買咗杯鳳梨汁來KO佢，艾菲都要同佢解釋一輪我哋來做咩同點解咁熱咁多人，佢先叫做好D無再扭。
呢個一來到就買嘅小熊燒，都唔知等咗佢幾耐先成功得到佢嘅垂青，後尾發現D嘢食真係堅好味，就識得來同我哋爭食啦﹗
台灣夜市又點少得小朋友玩意，但艾菲入咗錢先醒起燒腩仔係唔識
雖然唔識玩扑傻瓜又夾唔到公仔，不過就勁醒咁識拉我哋行返轉頭，話要玩呢架紅色車囉﹗
食飽買埋呢個好出名嘅諾貝爾奶凍做是晚宵夜就返民宿啦， 都真係幾好味同抵食，不過要雪所以唔可以帶返香港做手信。
返房沖完涼又來瘋狂sir滑梯啦﹗Hyper到震不停跑來跑去大笑大叫，好彩間房喺地下唔會嘈到人﹗
有個爸爸仲教佢將D波拎上去，再逐個喺滑梯到Sir返落來...
媽媽正常D，只係教佢暱埋入個窿到冷靜吓...
玩玩吓連呢個墊滑梯底嘅砌圖膠墊都唔放過...
花咗勁多口水，畀佢玩到成十一點幾，先終於成功氹到佢上床瞓，臨瞓都仲猛話好鐘意呢個「新屋企」（為咗令佢感覺有親切感D，我哋將所有住嘅酒店都統稱為新屋企），其實我哋搞咁多嘢都係想你玩得開心姐，宜家見到你咁高興艾菲就心滿意足啦﹗
Day 1 HK>宜蘭 part 1
沒有留言:
張貼留言