睇完小丸子，我哋跳上的士，就去咗101嘅鼎泰豐，據講呢間鋪面大D新D，有high chair又容易D拎位，點知...來到一睇都要等成90分鐘﹗其實艾菲個心係有D想縮沙走人，亦feel到米高對艾菲呢個安排唔多滿意，但眼見隔離food court坐滿自由人，而且之後嘅重點行程誠品都喺附近，根本走唔到去邊就唯有頂硬上繼續等。
既然等位無嘢做，就梗係四圍逛吓啦，然後帶咗燒腩仔去呢個LOVE地標影吓相。
最終等咗70分鐘左右就有得入座，餐廳果然係好baby friendly，除咗high chair，仲有全套自家品牌兒童餐具，而艾菲由香港等到來台灣嘅小籠包亦終於出現眼前﹗
除咗小籠包，我哋仲點咗元盅牛肉麵同菜肉大包，本來艾菲係想叫紅燒牛肉麵㗎，不過落單時個staff話無得走辣，推介我哋試元盅牛肉麵，估唔到清清地又幾OK喎，D牛肉超腍勁好味，至於個菜肉大包就正常啦。
燒腩仔勁識貨，一坐底先同我哋爭食咗三個小籠包﹗再掃咗大半碗牛肉麵落肚﹗跟手食多半個菜肉大包﹗咁多日以來最開胃係呢餐﹗
我哋食飽就走，肯定無坐到45分鐘，真係等位仲耐過食，但身為一個小籠包fans，來到台灣唔食返餐又硬係差D嘢咁，嘻...
走嘅時候順便捉燒腩仔喺遠處影返成棟101，唔上去都總算到此一遊嘛﹗（一返市區就無心機影相，求其用iphone影就算>.<）
由於我哋plan咗坐五點半國光客運去機場食晚飯，所以喺鼎泰豐花咗咁多時間，之後嘅行程都要加速進行，一去到誠品我哋就直衝上五樓兒童館，米高負責陪燒腩仔四圍玩，艾菲就爭取時間揀書。
雖然只係得一個鐘嘅時間，艾菲都成功買到呢堆心頭好，除咗《我吃拉麵的時候》個主題有少少沉重，其餘都好啱燒腩仔口味，而《幸福小雞成長書包》入面四本小雞系列嘅書，更加係佢嘅飛佛，宜家日日都叫住睇小雞，每晚都要同佢講一次先得，連米高都話呢套書真係好抵買。
原定行程係離開誠品後，再去附近嘅百貨公司食tea同買手信，不過由於時間實在緊逼，所以改咗直接返酒店拎返件行李再去台北車站附近四圍逛多陣就算，點知拎完行李就收到國泰SMS話班機會delay個半鐘，米高即時決定食埋晚飯先慢慢入機場，然後喺台北車站百無聊賴咁行吓行吓，就畀艾菲見到每次來台灣都必食嘅Mister Donut（但好奇怪地去日本又唔會食㗎喎），再行吓行吓仲見到艾菲一直回味嘅臺鐵便當添，想當日同米高拍拖去十分，上火車前就喺呢到買咗個便當食，包裝雖然唔特別討好，但食落係估你唔到咁好味，真係去日本鐵道遊咗咁多次，都食唔到好味過佢嘅便當呀﹗
正當我哋食完便當諗住起行去巴士站走時，就再一次收到國泰話班機會再遲多一個鐘嘅SMS，為免太早去機場hea，決定行埋新光三越嘅超市先，亦因為咁而畀艾菲喺到買到呢期當造嘅愛文芒（之前睇親都係禮盒裝，呢到終於有單個買）同醬油膏，臨走仲試埋春水堂嘅珍珠奶茶添，個茶味果然係香濃過香港嘅多多聲﹗
hea到七點幾八點，我哋終於都坐國光客運出發去機場，到機場之後第一時間唔係去check in寄行李，而係直上三樓搵維格，其實宜家香港咩都有得買，所以去台灣真係無咩手信好買，本來想買D洪瑞珍三文治返來試吓㗎，但四點幾去到台北車站間鋪已經賣晒兼閂埋門，之後只係好隨意咁買咗快車肉乾嘅豬肉紙，同艾菲好like嘅維格芝士味爆谷同鴛鴦綠豆糕就收手啦﹗
pack好行李就返去國泰櫃台check in啦，仲好榮幸咁收到三張由國泰送出，每位乘客一張嘅TW$200餐飲券添，唔...真係多謝晒喎...雖然艾菲同米高都係為食底，不過我哋其實想準時登機，儘早返屋企多D囉﹗
既然國泰咁豪請我哋食嘢，艾菲就唯有配合吓啦，夜晚十點幾坐喺機場餐廳，好闊太咁飲個燉湯再歎返杯果茶，真係坐咁多次飛機都未試過有呢種另類享受...（以前做嘢出trip喺大陸機場delay幾個鐘，逼住捱難食飯盒就試得多...）
至於米高就叫咗呢個炸雞漢堡配薯條餐，佢話好好味喎，仲話下次再來可以考慮再食呢間餐廳（艾菲返到來已經唔記得間餐廳叫咩名:P），而燒腩仔就難得地合作，一早起身嘅佢捱到呢個鐘數都未扭眼瞓，畀兩架巴士佢就乖乖坐定陪我哋食。
食完都十一點㗎啦，但行過我哋個gate，見到起飛時間又延遲多半個鐘，為咗令燒腩仔保持清醒上機（主要唔想上機時由手抱轉坐落凳時郁到佢爆喊），點都要搵D嘢同佢搞吓，好彩有間賣米奇嘢嘅鋪頭未收。
之後連Hello Kitty滑梯都玩埋...
玩到十一點半，都要返閘口等上機啦，原定2115起飛嘅機，報稱delay到2355就會飛，然後喺閘口坐到2350，先見到班機埋閘口落客，隔多五分鐘先宣布話0015可以登機，等到呢個moment，真心有D燥底，而燒腩仔亦開始眼瞓蟲發作，行為開始失常同失控，唯有叫米高抱住佢瞓先。
都唔知係marco polo會員還是帶住小朋友啦，總之我哋有得優先上機，然後一見到帶位嘅空姐，艾菲即時request拎枕頭畀燒腩仔，亦好彩佢喺轉落凳嘅一刻無發作，終於架機喺0045先飛到，足足delay咗三個半鐘﹗﹗﹗
起飛無耐，空姐們就極速派餐，左邊係燒腩仔嘅兒童餐，艾菲嘅食後感係好睇唔好食，至於右邊嘅就係大人正常餐，一打開就已經唔想食囉﹗
正當艾菲食飽諗住享受吓難得嘅寧靜，睇吓雜誌聽吓歌咁，燒腩仔就忽然醒咗喺到爆喊，仲癲到出手狂打艾菲添（好彩避到），之後要將佢瞓平捱落艾菲大脾到先收聲瞓返，但佢收聲無耐就有廣播話準備落機要大家坐返好，咁艾菲都嘗試將燒腩仔坐返直來瞓啦，可惜個結果係成個機倉嘅乘客，一邊忍受佢嘅喊聲，一邊期待架機快D降落，終於忍到架機降落咗但未駛到閘口，艾菲已經頂唔住要將佢抱起，再pass畀坐隔離行嘅米高，然後佢一上米高身即九秒九收聲繼續瞓...（佢出親街都要米高抱先肯瞓，艾菲抱親都瞓唔到，唔知係唔係嫌艾菲膊頭唔夠橫）
落機過完關，已經call定的士喺出面等，亦好彩件行李有得優先處理好快拎得走人，急急腳咁衝出去上車，最終返到屋企都已經三點幾，唉...又唔係天氣差，又唔係有咩大事發生，更加唔係機件問題，都可以無端端delay幾個鐘（國泰報稱係台灣領空問題），唔通下次去台灣真係要轉坐長榮先得？
Day 1 HK>宜蘭 part 1
Day 1 HK>宜蘭 part 2
Day 2 宜蘭>台北 part 1
Day 2 宜蘭>台北 part 2
Day 3 台北>野柳>台北 part 1
Day 3 台北>野柳>台北 part 2
Day 4 台北>HK part 1
沒有留言:
張貼留言