31個月

遲咗成個星期有多，媽媽終於得閒安排我出場見吓大家啦﹗我呢個造型得唔得呀？你哋見到我有幾多隻眼呀？kakaka...



呢個月嘅食量終於回復正常，雖然食得無之前咁積極，都可以喺半個鐘左右完成，如果有蛋或者有汁撈飯的話我可以狂食唔停，喺零食嘅限制上媽媽都放寬咗好多，今個月最開心係終於有得食魚肉腸，火腿同叉燒，之前媽媽成日話要大個仔先可以食㗎，我宜家食完真係覺得自己大個仔咗呀﹗嘻...（艾菲：佢第一次食魚肉腸時真係好開心咁同艾菲講「媽媽，我可以食腸啦﹗」）



瞓覺都係一時時乖，夜晚十點幾入房，通常會搞到十一點先瞓到，但明顯少咗半夜喊醒，一覺可以瞓到第二朝十點，而媽媽終於發現陪瞓服務係唔停得，否則我可以喺床到碌成個鐘都唔願瞓，不過有時我唔乖激嬲佢，佢就會罰我換爸爸入來陪瞓（嗚...我要媽媽呀﹗），照舊放學返屋企會瞓一個鐘晏覺，但次次夠鐘都唔肯起身，要同爸爸媽媽激戰一輪先出到房。



活動能力無咩突破，係落樓梯時越來越心急會扯住大人跑落去，媽媽索性叫我試吓一步一級咁落，但暫時都未係好得，行路時依然論論盡盡一心急就好易跌，小肌肉方面只係油顏色有力咗，呢排學校教用鉸剪剪泥膠同開瑣，全部做到但做得好慢唔太熟練，媽媽話要同我多D練習先得喎。



認知能力越來越好，左右已經識分，你我他都好少會用錯，不過所有之前發生嘅嘢會話「尋日」（艾菲：成日都會話「我尋日做/去咗XXX」，但明明係成個月前發生嘅事），已經認得晒大細階嘅英文字母，仲開始對應到某D字嘅中文同英文，例如媽媽問我蘋果英文係咩我會答apple，貓英文係咩我會答cat，爸爸媽媽無特別谷我學英文，但我好記得學校英文老師教過嘅英文，簡中會畀到D驚喜媽媽（艾菲：有日佢忽然同我哋講開心即係happy，同唱返上堂學過嘅英文歌出來，又突然扮老師點名再講晒成組同學仔嘅英文名出來，完全無諗過佢一星期先上一堂英文會記到咁多嘢）。

數字除咗7會讀錯做1or4之外（艾菲：但講英文就會識讀seven無撈亂㗎喎），其他都認到同讀到，數數可以由1數到20，但數數量好多時仲係亂來，宜家出街畀爸爸媽媽考巴士號碼都有九成會答得啱，仲記得晒去公公婆婆，爺爺嫲嫲同迪士尼要坐嘅唔同巴士號碼，早兩日媽媽拎咗個5蚊銀出來教我話佢叫5蚊，第二日我已經識拎住個2蚊銀讀「二蚊」，不過唔知點解仲未識砌砌圖，媽媽話來緊要特訓吓我喎。



越來越識得同人相處，對住表妹浵會好溫柔，雖然都會爭玩具玩，但從來唔會出手打人，之前去表姨婚禮，同表妹Belle玩得勁開心，走咗之後仲猛咁話要搵佢，去公園會同其他小朋友傾偈有商有量，又會掛住錫佢嘅人，成日問住姨婆姨丈公去咗邊，記得每次見佢哋都會收到一架車仔做禮物，見到舅父單拖返婆婆到食飯又會問舅父個姐姐點解唔一齊來。



自理能力都係咁上下，返學放學繼續自己著校服同除校服，雖然著得好慢又會扭扭擰擰咁，但媽媽話大個仔一定要自己學照顧自己喎，至於potty training就越來越好，宜家好間中先會出一次意外整濕褲，出街雖然仲會著學習褲，但可以keep到一日全乾咁返屋企，只要大人定時定候提我去廁所就OK（唔提就會忍到就快忍唔住先出聲話要vee），就算出街poo都無問題，至於瞓覺片亦成功keep到大半個月全乾，只係好多時瞓醒會扭計發脾氣話唔去廁所，要大人惡鬧先肯除返條片出來vee。

把口照舊由起身講到瞓覺先會停，仲做埋管家咁管住媽媽，有次放學返屋企瞓晏覺，我扭媽媽陪我一齊瞓，佢居然就咁除咗外套著住小背心就話同我一齊瞓，我即刻話佢「你做咩唔著衫﹗快D去換返衫啦﹗」，媽媽唔聽我仲嬲到喊咗出來唔肯瞓添呀﹗（艾菲：明明著咗衫換咩衫呢？？？）又會皇帝點燈咁欽點爸爸陪我坐車頭睇司機叔叔揸車，有次佢唔想我就問佢「你做咩姐？坐啦，唔使驚㗎﹗」，笑到媽媽肚痛咁滯。



最後又到講情感發展啦，媽媽話我呢個月好terrible，成日故意挑戰一D一早定立好，run得好順嘅規矩，搞到日日都家嘈屋閉，不過經過一輪拉鋸之後，媽媽已經表明佢「一步都唔會讓」（艾菲：原來真係要咁樣講出來，同話佢知你知佢做緊咩，等佢死咗條心先得），咁我唔想佢唔開心唯有收手啦，宜家已經由之前高峰期嘅全日扭，進步到一日扭一至兩次啦﹗（艾菲：當然都要爸爸媽媽好有技巧咁處理佢嘅問題先得啦）

媽媽仲話我唔話得，次次佢話親我D嘢做唔啱，我都會專登繼續錯落去，又或者唔理佢唔改正唔出聲以示抗議，所以我做親功課都要搞好耐（艾菲：勁勞氣呀﹗）， 宜家出街無再話怕陌生人，但如果發現人哋望住我都會怕醜仔上身，心情好時會回返人哋一個甜笑，甚至有問有答都得，但更多時候係擰歪面or合埋眼，仲試過暱喺爸爸媽媽後面，最勁一次係坐電梯時專登擰轉身貼實電梯唔畀人哋望到佢，搞到爸爸媽媽勁尷尬呀﹗