我哋一家三口朝早準時九點就到達姨婆屋企，好彩姨婆都早有準備，知道燒腩仔鐘意車，一早就買定兩架Q版九巴畀燒腩仔，佢幾乎全日都拎住兩架巴士未放過手咁滯，而燒腩仔身上著緊呢套衫，都係姨婆sponsor嘅，著起之後真係好sharp醒呀，同表妹Belle企埋一齊，勁cute囉﹗
等咗差唔多一個鐘左右，新郎哥終於出現，但個攝影師哥哥好似唔係好想其他親友參與其中咁，不停叫我哋企埋一邊，唔好阻住姊妹們玩新郎喎，well...我都係第一次見到攝影師會叫親友行開，仲要全程擋喺我哋前面唔想畀我哋睇咁，更加係唔會舉機snap shot吓親友們嘅反應啦，實在係奇怪奇怪，不過好彩燒腩仔無被影響，自得其樂咁撩完表妹Belle玩，就去搞表妹浵個零食盒，都懶理其他人咩事大吵大鬧啦。
玩完新郎當然係到最簡單而隆重嘅敬茶儀式啦，連平日做開細嘅艾菲都有份飲茶呀﹗呵呵呵...到呢個moment，燒腩仔開始有些少失控，忽然興奮mode尖叫咗幾聲，好彩氹吓話吓都stop到，等到儀式完成，即刻去搵D新嘢畀佢玩，隨手就拎咗玩新郎枝變身棒，對於細個極愛《美少女戰士》嘅艾菲來講，對呢D周邊產品總係有份情意結，燒腩仔姨丈仲好搞笑咁教佢拎住枝變身棒變身添﹗舉高變身棒...轉圈...跳一下...我係愛與正義嘅化身Sailor Lam﹗
等新娘出門後，兩個小朋友就走咗入表姨間房到玩，可能表妹浵始終仲細，未識行又未係好識畀反應佢，燒腩仔明顯鐘意同大表妹浵三個月嘅表妹Belle玩多D，我哋走咗之後仲猛咁嘈住要返轉頭搵表妹Belle，怪我哋漏低表妹Belle唔帶埋佢走。>.<
由於米高要趕住去返工，所以完成上半場之後，我哋兩母子就返咗燒腩仔婆婆屋企休息一陣，到傍晚時份同燒腩仔換過另一件飲衫，就去酒樓準備下半場啦，一見到個咁靚嘅三角琴，艾菲點會放過畀佢扮鋼琴王子嘅機會吖，佢雖然唔肯畀艾菲捉住隻手來彈，但艾菲都好欣賞佢從來唔會亂拍亂打琴鍵嘅作風，證明佢都係個愛琴之士，知道琴係用來彈唔係用來打，唔...等到你夠年齡嘅時候，只要你願意學艾菲一定會親自教你彈。
同燒腩仔扮完鋼琴王子後，艾菲就交低咗佢畀燒腩仔公公，自己入新娘房化妝啦，而無媽媽看管住嘅燒腩仔，當然係好開心咁滿場飛啦，事後姨婆仲同艾菲匯報，話佢成功捊擄一眾侍應姨姨嘅心（到我哋走嘅時候，真係有侍應姨姨專登埋來同佢講bye bye），等到表妹Belle來，佢兩個仲十足十花仔花女咁，手拖手喺到行來行去，氹到D賓客勁開心囉﹗
雖則燒腩仔表面睇好似好可愛好乖巧咁，但佢呢晚都唔係真係咁合作㗎咋，每次叫親影相都扭扭擰擰，一係行到台下企定點都唔肯上去，一係就走咗去喺酒樓到失控狂奔，最衰係艾菲著住裙同高踭鞋唔係好搬/追得到佢，有次輪到我哋上台影相時，佢居然話要自己企台前級樓梯影，連表姨都聽到O晒咀，仲勁抗拒表姨D晚裝嘅裙腳唔肯企埋去，好彩艾菲有帶定反斗車王貼紙傍身，加埋姨婆朝早送嘅兩架巴士，先成功KO佢咋﹗
而我哋等埋表妹浵ready，就襯新娘換衫時上咗去台側嘅貴妃椅到影相，咁三個小朋友一齊影相當然又要搞一輪先OK啦，呢個時候攝影師哥哥又好似唔多滿意咁望住我哋，更加係無舉過機幫手影相啦，但當時明明係無其他人要影相㗎喎，而且類似情況已經唔係第一次發生，之前燒腩仔同表妹Belle拖住手行過佢後面時，佢直情出聲趕佢兩個走話阻住佢影相，即你set晒腳架企定定影台前，兩個小朋友喺你後面行過點阻到你呢請問，真心覺得佢嘅工作態度好唔OK囉，邊有人會對新娘親友咁唔友善㗎﹗
好不容易，先終於等到夠鐘入席開場，事先已經同燒腩仔講過新人進場會熄燈（上次帶佢去飲已經因為人哋熄燈而爆喊），到正式嘅時候佢就不停話好驚同要艾菲帶佢走，不過生仔點會唔知仔心肝吖，佢擺明係想搞事，根本就唔係真驚，如果真驚一定爆喊同捉實艾菲唔放，艾菲見氹咗佢一輪，佢都仲係堅持話驚，就無好氣咁同佢講，「咁你合埋眼唔望咪唔驚囉」，估唔到佢真係合實對眼合咗成分鐘，笑到我哋成圍枱嘅人肚痛咁滯，最後當然係自己頂唔住擘返大對眼啦，kakaka...
另外都仲有個笑話，繼上次農暦新年時艾菲搽紅色指甲油，燒腩仔畀米高教唆來問艾菲係唔係受傷流血，跟住仲成朝唔肯掂艾菲隻手後，今次艾菲喺新娘房化完妝出來，佢又不停指住艾菲個咀問，「媽媽，你個紅色咀做咩呀」，之後米高來到仲要專登話畀佢知「媽媽紅色咀呀」，艾菲知平日少化妝你睇，但你都唔使驚訝成咁㗎喎﹗
沒有留言:
張貼留言