燒腩仔未足兩歲，艾菲已經心大心細想買scooter畀佢玩，仲一早睇中咗反斗城賣緊架3in1嘅scooter添，不過七百幾蚊部真係有D貴，加上燒腩仔當時連單車都仲未識踩，平日已經唔係多時間帶佢落去玩，再加多部scooter就肯定會冷落部單車，感覺好似有D浪費，所以呢件事就不了了之咗。
直至最近復活節去米高朋友屋企玩，主人家拎咗個女（大燒腩仔兩個月）部scooter出來畀小朋友玩，呢個燒腩仔居然一上車就識踩，嗰吓感覺真係好amazing（因為真係無教過，完全唔知佢點解會識），再加上佢宜家都總算踩到幾步單車，而喺朋友屋企玩完之後亦對部scooter念念不忘，於是買scooter呢件事又再次喺艾菲腦海到重燃。
米高都知買scooter呢件事係遲定早嘅問題，所以無反對仲叫艾菲要揀部好D，不過反斗城熱賣緊嘅實在太貴，出面街賣二三百蚊嘅又多人話唔好踩唔穩陣，之後醒起呢個世界仲有樣嘢叫淘寶，再加上BK到有唔少媽媽買過話OK，於是就膽粗粗咁上淘寶搵，終於畀艾菲搵到間有過千個好評，加30蚊人仔就可以順豐直接運落香港嘅鋪頭，佢有摺得埋同無得摺兩款揀，見都只係相差廿蚊人仔就揀咗摺得埋呢款，送埋護膝護踭，車頭燈同鈴鈴，承惠198人仔一部，連運費到香港即大約300蚊就OK。
藍色係燒腩仔自己揀（如果艾菲揀一定要sharp醒嘅綠色），佢放學返來見到部scooter，即刻興奮到「嘩」一聲叫出來，見到佢呢個反應艾菲就覺得物有所值，而貪玩嘅艾菲都忍唔住試踩咗幾腳（部車可以較高低，適合70cm-160cm嘅人玩，即係細粒嘅艾菲絕對玩得），部車都幾smooth同穩陣，感覺似係唔易爛，不過
等咗幾日終於有時間帶燒腩仔落樓下平台試車，呢個小朋友一聽到有得玩就即刻開心到忘晒形，不過玩之前我哋都堅持要佢戴咗護膝護踭先，因為佢個人實在太輪盡，平日行路都成日橫衝直撞好易跌，頭盔艾菲就仍然物色中，雖然佢未必肯戴（佢本身對戴帽好抗拒），不過都好大機會會買返個畀佢威，始終安全第一嘛。
玩咗陣就車神上身，為咗令D閃燈轆著燈，勁大膽咁越踩越快...
不過佢其實仲未識得轉方向，轉彎...係手動嘅...
停車呢...係就咁跳落來，kakaka...
燒腩仔：有本事就來追我啦，bye bye你條尾...
沒有留言:
張貼留言