雖然我哋有銀卡可以慢慢玩，但話晒今次都係燒腩仔第一次入迪士尼，個心始終想佢玩得盡慶D， 所以揀咗上星期四同佢逃學去玩（以為會少人D），我哋一早就起身出發，十一點左右已經到迪士尼。
可能真係第一次來，未知迪士尼有幾好玩，所以沿途一D都唔興奮（除咗坐米奇列車），來到正門同城堡嘅影相位，連叫佢落BB車或者望吓鏡頭都唔肯。 >.<
唯有帶佢入城堡搵吓Mickey先啦，原先想帶佢睇Golden Mickey，見未夠鐘就諗住排小飛象打發時間，點知...今日唔知做咩勁多人，再加埋前面班強國人不停打尖，都等咗成九個字先玩到，玩完過返去已經full晒無得入啦﹗
無得睇Goldne Mickey，就轉咗去小小世界坐船仔，為免畀D強國人喺我哋後面大叫嘈住晒，艾菲同米高決定主動爭取坐船尾，果然坐船尾係特別寧靜同舒服，燒腩仔睇得勁興奮同投入，沿途四圍望仲不停話我哋知見到咩。
坐完船仔出來就去搵食，好好彩好快就搵到張枱食飯，不過米高買嘢食時艾菲就時運極高，見到個五六歲嘅男仔喺我哋後面嘅花叢對住艾菲同燒腩仔淋花（同我哋個位嘅距離只係一米左右）﹗﹗﹗而重點係洗手間只係距離佢企嘅位置四十步左右﹗﹗﹗而更重要嘅係個男仔嘅媽媽係完全無理過個仔﹗﹗﹗OMG﹗﹗﹗
食飽我哋見夢想花園唔太多人排隊，就決定爭取時間入去同卡通入物影咗相先，不過要一個兩歲小朋友乖乖地跟住大人排隊，都實在係有D難度，好彩艾菲都早有準備，帶定兩包糖入去，一扭就畀一粒佢食，食完又呃吓佢飲吓水，總算無大吵大鬧保持住好心情。
我哋第一個見嘅就係燒腩仔第二至愛Mickey啦，每次睇返呢四張連環圖艾菲就會忍唔住笑，呢排叫親佢影想都樣衰衰嘅燒腩仔，見到Mickey即刻上晒身咁，握手摸面再大笑合照都無問題，仲懶叻咁自己整個Happy Face出來畀艾菲影添呀﹗
之後同Pluto影相，燒腩仔就扮唔識人，Pluto攬佢時仲想走佬添，但明明晚晚都攬住Pluto公仔瞓，睇親《Mickey Mouse Clubhouse》都叫住Pluto㗎喎﹗
到Goofy呢，都係衰樣勁唔合作，先來伸脷，再來唔望鏡頭，好彩影相姐姐有心機幫手氹佢先好少少。
同卡通人物影完相就出去等睇parade，我哋預咗半個鐘等，咁要燒腩仔乖乖地一齊等，艾菲當然又要出D法寶啦，除咗一早準備定坐墊（呢張坐墊細細張坐三個人啱啱好，係想當年去日本旅行時買，專係去主題公園等睇parade時用），亦準備好tea time零食，再開巧虎畀佢睇吓，加上大會嘅廣播，半個鐘都算容易過。
艾菲同米高都有幾年無入迪士尼啦，之前睇咗幾年都係一模一樣嘅花車終於換晒，新呢D花車都幾靚呀，亦多咗D同觀眾嘅互動位，可惜我哋坐個位唔係對住花車停嘅位，艾菲想帶燒腩仔出去玩時，D staff已經話太多人stop咗我哋唔畀去。
睇完parade，燒腩仔即刻上咗BB車瞓晏覺，艾菲同米高就剩機食吓嘢行吓街，等燒腩仔起身就過去Toy Story Land繼續玩，早一個星期日艾菲先畀咗《Toy Story》第一集燒腩仔睇，所以佢都大概知道胡迪係乜水，但初次見面都係樣衰衰咁，反而架搖控車就勁like，自己整晒happy face畀艾菲影...
呢邊有三個game玩，但沖天搖控車太激啦，轉轉彈弓狗又勁多人排咁，艾菲見玩具兵團跳降傘好似幾過癮就問燒腩仔想唔想玩，一問米高已經想話艾菲，但燒腩仔就好堅定咁同艾菲講「玩呀」，畀佢喺出面睇多次人哋玩，佢都依然話想玩，於是艾菲就同佢去排隊，留低米高喺出面等我哋，結果啦...個game嘅離心力比艾菲想像中大好多（一個81cm高就玩得嘅game，未免太刺激啦），燒腩仔好興奮咁坐上去等玩，但上到半空就驚到手都震晒，嚇到艾菲仲驚過佢，好彩落返來時問佢仲驚唔驚佢都識答「唔驚」，問佢下次仲玩唔玩更加係即答「唔玩」。
玩完跳降傘之後，我哋就出返去邊食pizza邊等睇光影巡遊啦，果然係好值得睇嘅parade，D花車真係好靚，中咗《Cars》毒嘅燒腩仔，一見到Mc Queen出場，仲興奮到企咗起身想衝出去添呀﹗
光影巡遊同煙花相隔大概一個鐘左右，由於都已經天黑無咩好玩，搵咗靚位睇巡遊嘅遊客睇完都多數繼續留守，咁我哋都跟大隊留守咗喺城堡前，但為免燒腩仔頂唔住，期間艾菲都帶咗佢去探巴斯光年，仲約好咗下次要去玩巴斯光年同渣車，之後路過車仔檔有人見到Mc Queen即衝咗埋去搞搞震，好彩艾菲話同Mc Queen影張相就bye bye都肯，無扭買玩具超合作。
睇埋城堡煙花我哋就閃人啦，臨走前買咗個Mc Queen鬧鐘畀燒腩仔，佢開心到即晚已經搶住話用，第二朝仲真係聽到鬧鐘響就即刻起身㩒停佢添呀﹗
沒有留言:
張貼留言