足球小將

燒腩仔一直都有入字腳嘅問題，但隨住佢越來越大，個情況都明顯改善咗好多，不過當佢攰或者心急時，隻腳掌仍然會不其然咁向咗入，好容易就會因為咁而跌低，艾菲上網睇咗D資料，知道睇醫生幫助都唔係太大（之前問過醫生意見都係話等佢自己慢慢摸索改善就OK），反而得閒可以喺屋企同佢拉吓筋，同盡量唔好再畀佢趴喺到瞓（燒腩仔個case估計係細個成日趴喺到瞓而影響），記得有人講過踢波會有幫助，艾菲就成日推米高同燒腩仔踢，但喺屋企地方始終有限，跑多幾步都已經撞牆，終於上星期六我哋兩母子就獲得御准跟埋米高去踢波啦﹗



燒腩仔：未夠鐘攞場住，就等我喺場邊熱吓身先﹗



燒腩仔：等我扭吓花畀你哋睇啦﹗hehe...



燒腩仔：唏...我來啦﹗



燒腩仔：我係唔會畀你搶到個波㗎﹗



燒腩仔：終於來到龍門前啦﹗



燒腩仔：來個大腳抽射先﹗



燒腩仔：YEAH！入完波要將自己都衝埋入龍門慶祝是常識吧﹗



正式開波被趕離場做觀眾都睇得勁投入，喺艾菲嘅教導吓，好sweet咁不停叫住「爸爸加油」，kakaka...



睇波都不忙搞搞震，係咁㩒呢部汽水機，話要買定嘢飲畀爸爸飲喎... >.<

其實我哋只係襯熱身時間，畀燒腩仔落場踢咗半個鐘波，都已經玩到佢索晒氣流晒汗，但見到佢通球場走，又主動撩米高D波友陪佢踢，仲邊踢邊笑到咔咔聲，就知佢真係玩得好開心，之後米高正式開波，燒腩仔仲寧願企喺場邊大半粒鐘做啦啦隊，都唔肯返入室內地方坐添呀，睇來米高以後踢波都唔可以輕易賣甩呢個小朋友啦﹗呵呵呵...