燒腩茂又來啦﹗

雖然燒腩仔微燒咗一晚之後已經無再燒，但D鼻水就一直未清，唯有同佢請多幾日病假喺屋企休息，農暦新年前席都係小心D好，廢事返學校再同同學交叉感染啦，但成日流流長又唔落得街放電，總要畀D嘢燒腩仔做㗎嘛，終於的起心肝擠D時間出來同佢玩吓親子烘焙，而我哋今次就整咗日式蒸蛋糕，貪佢用蒸嘅方法無咁熱氣，仲可以順便試吓艾菲新配畀個Staub嘅美亞蒸架。



燒腩仔：Hi! 我燒腩茂又來啦﹗等我幫手介紹吓D材料先﹗

材料：（食譜係艾菲喺網上討論區copy返來嘅）
雞蛋  2隻
糖  75g
牛油  40g
牛奶  180ml
低筋麵粉  200g
泡打粉  4茶匙
雲呢拿油  幾滴



燒腩仔：嘻...整蛋糕梗係要有蛋啦﹗媽媽今次仲教咗我點打蛋添呀，打完蛋就話我知透明嘅係蛋白，黃色嘅波波原來叫做蛋黃喎﹗



燒腩仔：將蛋打咗落去大碗到之後，就可以將D糖都倒埋落去...



燒腩仔：之後用個打蛋器將D糖同蛋打到淡黃色就OK啦﹗



燒腩仔：搞掂個蛋漿就可以加牛油...



燒腩仔：再倒埋D牛奶落去...



燒腩仔：然後再用個打蛋器將佢哋撈均就OK啦﹗



燒腩仔：全部濕嘅嘢都撈均就可以開始將D粉篩入個蛋漿到...



燒腩仔：跟住將佢哋輕輕力撈均到無粉就可以停啦﹗（艾菲：要用切拌嘅方式攪，等D空氣唔好走咗去，如果攪走晒D泡就會發唔起㗎啦）



燒腩仔：跟住就逐D逐D筆落個杯到，記住八成滿就好停啦﹗



燒腩仔：YEAH！搞掂啦﹗係唔係好容易呢﹗



燒腩仔：之後就交畀媽媽拎去廚房用大火蒸15分鐘...



燒腩仔：嘩﹗發到好大個呀﹗等我哋自拍一張先﹗



燒腩仔：呢個蒸蛋糕嘅味道同質感都好似馬拉糕咁，好好味呀﹗