試用：全新百靈IRT 6520耳溫槍

近排流感肆虐，一向身體算好嘅燒腩仔都中咗招，仲要來勢兇兇話來就來，早一日佢仲龍精虎猛搞搞震，第二日返學無耐就接到班主任電話話佢個樣好似好攰，到接佢放學時已經摸到佢有D熱，傍晚時間去睇醫生時已經發緊燒，之後成晚都keep住38度左右，好彩第二日我哋就收到MyBB抽中嘅全新百靈IRT 6520耳溫槍，可以即刻開來試用，自己mon住燒腩仔嘅體溫。



百靈ThermoScan耳溫槍，對有小朋友嘅家長來講一D都唔陌生啦，基本上絕大多數嘅醫院同診所都係用佢哋嘅耳溫槍，可以話係專業同信心之選。



拆盒之後就會見到左邊幅相嘅耳溫槍，耳套，同埋保護盒，耳套啱啱好可以放入保護盒到，將佢哋合併之後就會變成右邊幅相咁，細細個一D都唔阻地方，又唔怕整爛個耳溫槍同整唔見D耳套。



今次呢款新耳溫槍嘅賣點之一就係AgeSmart年齡選擇功能，有三個年齡組別可以揀，分別係0-3個月，3-36個月同埋36個月以上-成年人，我哋畀燒腩仔用就梗係揀3-36個月啦。



揀好年齡組之後就可以同燒腩仔量體溫啦，由於佢食完藥抖咗一日之後已經退咗燒好返好多，所以試用部耳溫槍時好似發現新玩具咁勁hyper，仲搶住話要自己同自己嘟，咁事實部耳溫槍都真係好易用，有獨特嘅位置偵測系統，用顯示燈同提示聲提你個位啱唔啱，我哋只係同佢度咗一次，佢已經知點用同㩒邊個制。



睇吓幾多度先，綠色燈36.7度，即係無發燒，耳溫槍嘅另一個賣點，就係會用顏色來顯示體溫狀況，綠色燈即係體溫正常，黃色燈即係輕度發燒，紅色燈即係高燒，而呢個發燒提示係會隨年齡調節，例如0-3個月嘅BB over 37.4度已經係高燒會著紅色燈，但3-36個月嘅小朋友就over37.6度先算發燒著黃色燈，再over 38.5度先算係高燒著紅色燈，呢個function對無乜記性嘅艾菲來講真係好方便，一睇顯示燈顏色就知有無事同嚴唔嚴重，唔使吓吓上網搵資料對返幾多度先係發燒同幾多度先算高燒。



耳溫槍除咗有專利預熱測溫頭，降低度體溫時所產生嘅冷卻效應，確保連續測溫嘅準確度之外，仲有好方便嘅夜光功能，以後就算半夜入房同燒腩仔度體溫，都唔使專登開大燈整醒佢啦。



至於記憶功能都係唔少得嘅，可以保存最近9次嘅讀數，嘻...呢個M5嘅度數其實係艾菲嘅，見燒腩仔玩得咁開心，艾菲自己都忍唔住試埋一份，只係每次換一個耳套就可以一家人共用一部耳溫槍，唔使怕交叉感染又可以確保測溫嘅準確度，Good！