燒腩仔揮春

一年一度燒腩仔揮春又來啦，上年pat pat痕試整之後，燒腩仔婆婆同嫲嫲都勁like，就連燒腩仔姨媽都真係將D揮春貼足一年，咁今年基本上都無藉口唔整啦﹗

今年已經特登提早同燒腩仔剪定頭髮，亦學咗簡單執相可以唔理佢額頭道血痕，但拖吓拖吓都係拖到2月頭先得閒影相，最終等埋佢另一個partner表妹D相，搞到上星期通咗一晚頂先整完total 15張揮春﹗



一心以為今年燒腩仔識聽又識講，影相呢part會smooth D啦，點知...一切都只係艾菲太天真嘅諗法，實情係呢個小毛豆超唔合作，一係唔畀表情叫極唔笑或者唔望鏡頭，一係勁hyper不停跳不停搖，一係就做恭喜動作做到手抽筋咁，再唔係就搵D道具遮住自己個樣，點講點氹都唔太work，出動埋巧虎都不為所動，就連喺側邊幫手嘅米高都就來頂唔住想發火，最後艾菲只係每款相影到一張稍為滿意嘅就收工啦。



之後就來到執相砌稿嘅一part，吸收咗上年嘅經驗之後，今年明顯係快咗好多（上年要整幾晚先掂，今年一晚搞掂晒），但要一口氣砌十五張揮春都唔係小數目，砌到中段艾菲已經開始無乜idea，所以個別某D揮春，其實同上年嘅大同小異，就好似個福字都只係換咗張新相同搵咗個新嘅福字就算。



雖然搞到要通頂整確係好攰（真係年紀大啦...通完頂簡直想死...好彩之後一日米高放下午可以畀我叉返電），但睇見製成品又好開心喎，今年仲特別為表妹設計咗一set五張畀姨媽通屋貼，而艾菲就最鐘意家肥屋潤呢張，表妹仔真係將個肥字演繹得好好呀，kakaka...



設計好D揮春跟住就要做埋後期工作，一如往年嘅做法，艾菲都係叫米高幫手返公司用color printer印出來，再返來逐張貼透明PVC膠（文具鋪叫牆貼）同cut靚佢，艾菲今年一共要整45張，用咗12呎嘅PVC膠，成本大概係$50左右，肯定比用相紙低，不過就要通多一晚頂先搞得掂，但總算喺上星期五返娘家食團年飯前完成晒，來緊幾日可以安心忙其他過年嘅嘢啦﹗