Hello! Hello! 兩個月無見，大家有無掛住我呀？上個月媽媽返咗婆婆到休養，唔得閒寫我嘅27個月成長紀錄，佢話今個月一次過寫返，不過...都係遲咗幾日先出到街，唔...媽媽你下次可唔可以準時交功課呀？好多姨姨會掛住我㗎﹗（艾菲：REALLY？？？）
宜家我終於出齊牙，D食物可以整返大粒D自己咬，而我亦學識咗用筷子，係食得慢D但都完成到成碗麵㗎，仲有一樣嘢都係呢個月先學識嘅，就係自己用手拎住食物來食，之前我成日嫌D pizza雞翼春卷污糟唔肯用手拎，家陣已經克服到呢個心理障礙啦。
可能因為天氣凍啦，我呢兩個月好似瞓多咗，夜晚十點幾上床，一瞓就瞓到第二朝十點先起身（之前九點半前必醒），但依然係間中會半夜發開口夢喊醒，要媽媽跑過來安撫一輪先瞓返，至於晏覺就每日放學返屋企瞓一個鐘左右，不過次次都瞓到唔肯起身會發脾氣，搞到爸爸媽媽好頭痛（艾菲：出動到Mc Queen鬧鐘都唔掂）， 至於媽媽陪瞓服務就只係夜晚一覺先有，媽媽話我大個仔要開始習慣自己瞓喎，所以晏覺嘅陪瞓服務已經取消咗。
活動能力方面跑跑跳跳都無問題，係入字腳問題個人一心急又返來，搞到老師都話我輪輪盡盡成日跌，至於小肌肉發展都有明顯進步，舉手指公做叻叻手勢，V字同OK手勢都終於做到，撕紙，撕貼紙，拉拉鏈，解衫鈕同夾衫夾都無問題。
返學之後學識咗同人相處，好鐘意同同學仔玩，講得出全班同學仔D名，返學途中撞到同學仔會即刻追上去打招呼，再手拖手咁行返學校，又會去到某個位就拉住媽媽話要等埋某個同學仔（艾菲：明顯係等女同學啦...），成日人哋做咩我就跟，就連同學唔乖嘅嘢都跟足（艾菲：例如甩大人手跑咗去，同突然大叫之類），搞到畀媽媽話我好學唔學。
自理能力都有些少進步，繼除褲著褲同除開胸衫之後，呢兩個月終於學識著襪著鞋，雖然我手腳係慢D（艾菲：其實都唔係D啦，係勁慢囉），但媽媽宜家返學同出街都堅持要我自己著鞋唔畀其他人幫，會主動要求揹書包同揹袋，最鐘意爸爸媽媽買嘢同幫手拎嘢（艾菲：行超市無買嘢佢會有D失望咁款），至於potty training因為天氣太凍停咗無train，不過喺無媽媽嘅催谷下竟然又有D進展喎，最近呢個星期都會主動話畀媽媽知要wee wee，然後忍到入廁所除褲再對住青蛙仔（尿兜）先痾，無論喺屋企定學校，D學習褲都明顯用少咗，媽媽話等天氣暖返就要正式戒片啦﹗
呢期至愛就係扮大人，宜家除咗玩車之外最鐘意就係玩煮飯仔，日日都會煮飯畀爸爸媽媽食，有晚同麵包超人開生日會，除咗帶party帽之外，仲一定要媽媽拎個生日蛋糕出來畀我哋唱Happy Birthday，唱完歌仲跑去箱到拎部電話出來，好似媽媽平時用iphone影嘢食咁影個蛋糕（艾菲：呢吓真係笑到艾菲肚痛），而且我已經開始識得學是非，好似表妹有次喺婆婆屋企跌親，第二個星期再去婆婆屋企見到表姨，我就即刻指住案發現場同表姨講一次案發經過。
把口啦...係全日唔會收，而且講嘢越來越老積同估你唔到，好似有晚去嫲嫲屋企食飯，嫲嫲不停叫住小心飲湯唔好倒瀉，咁我就專登停落來，慢慢拎轉頭望住嫲嫲話「你做乜叫我姐」，搞到嫲嫲都唔好意思再話我，已經識得用我同你，最鐘意就係慢打鑼，媽媽講一句我又跟住講一句，自從學識數數字之後，出街成日會指住D巴士講幾多號（艾菲：都有一半會講得啱，但就成日左右調轉讀囉），記性超級好，繼《靜夜思》同《三字經》頭12句之後，我已經識唸埋《春曉》，而爺爺亦教咗我1-10同一D簡單筆畫（例如人同大）嘅中文字，我出街見到都會搶住話畀媽媽知㗎﹗
最後又到講情感發展，呢兩個月媽媽話我固執咗好多，好多時都會堅持己見唔聽人講，例如有日放學去到屋企樓下大堂，忽然同媽媽話要飲水，咁媽媽就話上返樓先飲，我死都唔肯於是勁喊唔收聲，搞到媽媽返到屋企又同我講咗輪道理，而媽媽最唔鐘意嘅摞地亦再次返來，激到媽媽要掉咗我深愛嘅車來教訓我，可惜我從來都無吸收過教訓，所以屋企D車都就快畀媽媽掉晒啦。
宜家返學已經唔會再扭，但放學時都係扭扭擰擰唔願走咁款，唔再怕陌生地方同陌生人，不過最黐個依然係媽媽，宜家做咗錯事激嬲媽媽，除咗會話「我要媽媽攬」（艾菲：有咩理由明明錯都未認錯仲要我攬返佢先），仲會話「我要媽媽要我」（艾菲：我從來無話過唔要佢㗎），慌死媽媽會掉低佢走咗去咁款，尤其係病咗時媽媽係一定唔可以離開我視線範圍㗎，就算婆婆公公話抱我都一定唔會畀囉﹗
沒有留言:
張貼留言