行年宵＠維園

難得執好屋，食晒團年飯，整好年糕，貼好揮春，入好全盒，仲要撞正米高年廿九放到下午，我哋就選擇咗今日同燒腩仔逃學去行年宵（佢間學校係返學返到年三十晚㗎，不過好多同學呢個星期都請假無返啦，尋日接放學都冷冷清清咁），等佢同人逼吓感受吓節日嘅氣氛。



其實星期日返燒腩仔爺爺嫲嫲屋企食團年飯前，我哋都已經帶咗佢去行觀塘嘅年宵市場，不過唔知係唔係時間太早，定撞啱落雨呢，成個年宵除咗花之外，乾貨真係無乜嘢睇，仲要冷冷清清咁無乜氣氛。



艾菲始終覺得維園先係最有氣氛嘅年宵市場，但要帶小朋友去真係要揀平日下午，就算今日已經係年廿九，人多極都有個譜，見其他家長就算推住BB車，都輕輕鬆鬆咁行到，唔似往年年廿八夜晚已經逼到人貼人。



不過啦，今日天氣實在太好，太陽伯伯一直照耀住我哋，又熱又有D眼瞓嘅燒腩仔，就算唔使行有米高抱住，都係呆呆滯滯乜都無興趣咁。



好彩行到中間，忽然有檔賣泡泡槍，有兩個哥哥企咗喺到不停吹D波出來，燒腩仔即刻回復hyper mode，主動要求落地去拍波，越拍越high玩到唔願走添呀﹗

行完乾貨區見有D口痕，我哋就去咗幫襯近銅鑼灣嘅ClubOne嘅booth，今年無食雞煲翅啦，但試咗呢個$25四隻嘅白酒忌廉青口，味道同質素係OK啦，即艾菲其實都識煮，不過平時喺街邊好少會有得當小食咁食嘛，至於燒腩仔就試咗麥芽糖餅，佢食到中段其實唔太夠牙力咬開，但就鐘意到唔捨得畀我哋幫佢食埋去囉﹗



睇完乾貨就輪到艾菲睇花，今年決定唔落花墟逼，本來都打算唔擺年花，但一場來到又有D唔心息想望吓揀吓，但燒腩仔耐性就認真有限，每當我哋停低睇花時，佢就會話「你哋做乜唔行姐」，跟手想扯我哋走。



咁仲想繼續慢慢睇花嘅艾菲，唯有出手買個波賄賂佢啦，其實入場之前都已經預咗會買波畀佢，但佢沿路又只係望無話想要，咁我哋梗係諗住慳返啦，點知食嘢時見到有個波飛咗去樹頂，佢居然話叫米高去拎返畀佢，我哋就懷疑佢其實唔係唔想要波，不過以為D波係屬於人哋，完全無買波嘅concept，所以一直無扭我哋買，直至艾菲主動出聲問佢，佢即刻話想要，仲識話要Mc Queen波波添（即佢其實一直都有留意住啦），不過米高始終唔想拎住個氫氣球咁麻煩，艾菲最終買咗個麵包超人吹氣公仔畀佢（唔大個容易拎，無咁易穿又玩得耐D），檔主鐵價不二唔肯減價，但就話可以扭多個波畀燒腩仔，咁艾菲就幫佢request咗Mc Queen，等佢一次過滿足晒麵包超人同Mc Queen兩個願望﹗



然後艾菲喺濕貨區行完一圈又一圈，睇極都無插花啱心水，最後係破天荒咁買咗盆細size嘅蝴蝶蘭返屋企擺（艾菲往年一直都只會考慮插花，貪佢易打理同無手尾跟），不過今年D蘭花確係開得好靚，而且併落燒腩仔公公盤水仙花到，都幾match吖，Good!



我哋行到五點幾先走，臨走時見燒腩仔瞓咗，就去咗登龍街間Pacfic Coffee食窩夫，順便坐吓休息吓，點知我哋order完無耐燒腩仔就醒，結果就多咗個人同我哋爭食啦...食飽再同佢行返過希慎去洗手間（佢今日好叻仔呀，出到街都識主動話要wee wee），偶遇叮噹專車之餘，仲要無人排隊影相，O...SO LUCKY!!! 燒腩仔呢個傻瓜不停望住車頂個竹蜻蜓轉，然後以為呢架係飛機來囉，kakaka...