小小農夫摘士多啤梨

上年已經想帶燒腩仔去摘士多啤梨，不過到醒起時已經近水尾，後來拖吓拖吓就無咗件事，今年的起心肝要帶燒腩仔去，但都拖到前一個星期日先成行...出發前艾菲上網search咗一輪資料，為免多人有考慮過粉嶺再入嘅士多啤梨園，不過米高話交通超唔方便ban咗，最終去咗比較多人推介嘅錦田鄉村俱樂部，可以喺西鐵錦上路站轉小巴過去，亦都相對多嘢玩同多人D。



艾菲：小小農夫準備好未？整咩個樣好似仲未瞓醒咁㗎？畀D精神啦﹗夠鐘開工啦﹗



燒腩仔：等我搵吓邊到有又大又紅嘅士多啤梨先

 

第一次畀佢試用鉸剪，剪到反晒手﹗>.<





燒腩仔：唔...呢粒都唔錯喎

呢到嘅士多啤梨節由十二月尾開始，到我哋去嘅呢一日，日本種已經畀人摘晒，法國種又只得D細細粒，好彩韓國種仲好OK。



燒腩仔：一粒...兩粒...三粒...好多粒呀﹗



燒腩仔：剪夠就梗係走人啦﹗我收工啦﹗YEAH！



燒腩仔：食邊粒先好呢？唔...真係又甜又多汁，勁好味呀﹗

基於我哋只係志在玩吓影吓相，所以喺到摘咗成個鐘，都只係摘咗十幾粒左右，承惠三十幾蚊，哈哈...超級抵呀﹗



而呢到除咗有士多啤梨摘之外，仲有蕃茄同埋椰菜摘㗎﹗
 


來到郊外地方，燒腩仔嘅心情都特別好，佢又好似想當日喺北海道花田咁，四圍喪走唔停，追到艾菲氣咳呢﹗ 



燒腩仔：呢到綠草如茵，等我扮朵花配合吓啦﹗



離開士多啤梨園之後，我哋帶咗燒腩仔去睇羊咩咩同白兔，其實都可以買料餵佢哋㗎，但見佢哋個樣都食到好飽咁，我哋就慳返留返下次先啦﹗

臨走前畀佢玩埋電動車（D車放晒喺當眼位，車迷父母都好難避得過），$30任玩十分鐘，燒腩仲仔好似知規矩咁，好醒咁不停換車，識踩油但完全無扭軚嘅concept，見柱都繼續直衝埋去，實在有艾菲開車嘅風範呀﹗hehe...



玩咗成朝都係時候講bye bye啦﹗下次有機會再來BBQ慢慢玩啦﹗