艾菲從來唔係D咩高材生亦唔特別醒，不過想當年就好好彩咁派到入區內band 1嘅中學，一讀就係七年，雖然一直係成績最差嘅一群，但至少學校畀咗一個傳統得來都算自由同開放嘅環境我哋，造就咗今日唔怕死同願意面對失敗嘅艾菲（無計啦，D同學實在太強，會考八A嘅同學係數以十計，艾菲就年年考尾幾，稍為諗歪D都真係會頂唔住），畢業之後幾年都有返去探過老師，但自從出來做嘢之後好難就時間，再加上部分教過艾菲嘅老師陸續退休，都真係好耐無返過去啦，咁啱畢業後返咗去教書嘅好姊妹通知，母校四十周年喺前一個星期六搞咗個fun fair，見幾得意就決定山長水遠都帶燒腩仔返去玩吓（山長水遠係一D都無誇張，皆因艾菲間母校位處山頂，打風落雨真係要攀山涉水先到㗎﹗）。
母校唔係一般政府倒模出來嘅學校，地方算大亦有自己設計，幾十年前仲拎過設計奬添㗎，而呢個位於正門嘅金魚池就係特色位之一，我哋當年返學放學日日都會行過，仲試過有同學玩到跌落水，而燒腩仔第一次行都有少少驚，因為佢級與級之間係有D罅，稍為唔小心就會跌落去，好彩佢最終都大步檻過。
至於紅磚牆都係母校嘅另一特色位，咁難得帶咗燒腩仔返來，梗係要捉佢喺到影吓相啦，不過叫佢整happy face，佢唔係遮住塊面就係合埋眼笑囉... >.<
母校今次fun fair都睇得出花咗幾多心思，專登做咗D紙版學生同特大學生證畀舊生影相，仲連汽球道具都準備埋，而艾菲就揀咗7A嘅汽球畀燒腩仔拎住，皆因呢個係艾菲畢業前嘅班別，宜家轉咗334學制考DSE，F.7都已經成為歴史啦﹗
艾菲同朋友影完相，又同老師吹完水，應酬一輪之後，點都要帶燒腩仔落樓下操場D攤位玩吓解吓悶，雖然無咩啱佢玩，但總算畀我哋搵到個低level D嘅掟彩虹，看檔嘅哥哥仲優待佢畀佢企最前掟，只可惜佢企咁埋都係掟唔中，kakaka...
玩完再奬佢去canteen飲返盒熱維他奶扮吓中學生先﹗唔知點解熱維他奶總係學校飲先最有風味，艾菲到宜家仲好懷念想當日天寒地凍，幾個同學圍埋一齊飲樽裝熱維他奶嘅滋味，呢D日子真係可一不可再呀﹗
沒有留言:
張貼留言