K2學校旅行

學校聖誕假期前一日係K2旅行日，對於兩年前錯過咗N班旅行日，上年K1又無份去旅行嘅艾菲同燒腩仔來講，都期待咗呢日幾耐，不過我哋未出發先擔心嘅係，學校要我哋八點半集合，到底平日無十點都起唔到身嘅三母子可唔可以準時現身呢？結果係可以㗎﹗呢朝大家都唔敢賴床扭擰，快快手手刷牙換衫餵奶出門口，仲夠時間喺學校附近買個麥當勞外賣早餐返課室食添﹗（拍手﹗拍手﹗）



喺課室同同學仔玩咗一輪之後我哋就上車出發，先去第一個地點大埔珀麗高爾夫球會打golf，學校旅行去打golf真係第一次聽，去到會有教練做簡單示範（即睇完你都無可能會識打嗰種），然後就兩家人（約六至七人）share一條球道任打一個鐘，主力當然係畀兩個小朋友玩，燒腩仔睇見同學仔打又好興奮咁跟住試打，不過睇相就知佢係有姿勢無實際啦﹗枝球棍亂咁飛，打完個波都唔知畀佢掃咗去邊﹗kakaka...



小朋友玩完，艾菲都有放低BB豆豬打咗幾球，差不多五六年無打過波，喺無帶任何私伙裝備下，仲打得郁兼打得起個波，都算係咁㗎啦，至於米高就終於恨到，可以親自教燒腩仔打golf（佢應該期待咗呢日四年），而燒腩仔為咗喺同學仔面前威威打遠D，亦罕有地乖乖聽爸爸教導，最搞笑係事後公公問燒腩仔知唔知爸爸識打golf，佢即答「我打得叻過佢啦」﹗得戚得佢呢...

學校聖誕節崇拜+慶祝會

話咁快八日聖誕假就過咗，燒腩仔都已經返學（今年暑假提前咗所以聖誕假放少咗），艾菲終於可以回一回氣，快手寫返聖誕節嘅精彩節目先，首先就係一年一度嘅學校聖誕節崇拜加慶祝會。



有過之前一年嘅經驗，加上燒腩仔又大個咗知道有得玩（老師同佢哋提過），早一星期已經開始日日提住返學校食雪糕車雪糕，所以艾菲都唔敢唔出席呢個活動，仲專登叫埋米高放半日假來幫手排隊，不過崇拜下午一點就開始米高趕唔切join，艾菲無得揀要一拖二出席，好彩BB豆豬都好合作，開始無耐飲咗陣奶就瞓咗，崇拜完先起身一齊玩。



崇拜完我哋就跟大隊一齊返學校玩，燒腩仔當然第一時間話要食雪糕，但條人龍已經長到轉咗幾個彎，好彩米高及時趕到幫手排隊，艾菲就花盡口水先氹到燒腩仔趁未係好多人時上二樓玩攤位遊戲，而其中一個遊戲係由燒腩仔嘅新班主任負責，總算有人幫手搞吓扭擰中的燒腩仔（唔...我哋一喺佢老師同學面前出現佢就會有D情緒）。

秋高氣爽去行山~索罟灣>榕樹灣

上次畀米高賣完豬仔之後，其實都無嚇窒艾菲，話咁快我哋已經plan定下次嘅目的地南丫島，等米高捱過咗公司嘅peak season，見啱啱個星期日天氣好又無特別嘢做就又gogogo，仲堅神心咁九點就出門過海去坐十點四班船入索罟灣（前一班八點幾真係無能為力去到坐啦﹗）。



由於入索罟灣嘅船少，所以我哋坐架船幾乎爆滿，我哋前面仲坐正一班六至十歲左右嘅小朋友，熱鬧到你想眠一眠叉吓電都唔得，好彩船程唔耐話咁快就到。

一年一度又+1

湊住兩個D時間好似火箭咁運行，唔知做過咩咁又過咗一日，一轉眼上星期三就係艾菲嘅生日，再加上生日前兩星期米高公司peak season忙到嘔，留低艾菲日日同兩個高需求小朋友單打獨鬥，仲要打敗仗一個星期內又腸胃炎塞奶同大傷風緊接住來病，所以今年真係對自己生日無咩特別期待，只係希望一家人開開心心健健康康地過。



作為一個FTM，生日無假放是常識吧，呢朝燒腩仔無發作跳掣仲識同艾菲講生日快樂已經執到，所以成功趕咗佢出門口上校車後，艾菲即去買個下午茶請自己食，然後就用盡方法扑暈BB豆豬畀自己抖一抖，等到米高下午三點幾返來接更（艾菲嘅生日優惠就係米高請半日假返來幫手湊仔），先叫做鬆一口氣可以放鬆心情做吓自己想做嘅嘢。



等燒腩仔放學返來做完功課，我哋就出發去食飯，因為知道米高會後補生日飯，正日呢餐艾菲就決定hea食，去咗食宜家假期基本上係無可能搵到位嘅Ikea，貪佢食物OK又夠baby friendly，唔...阿媽連諗食咩都係諗小朋友先，呢個應該係天性來除非唔係。

DIY母乳皂

之前整母乳cream時都提過，艾菲屋企有大堆過期冰奶要清，整cream每次只清到90ml，長遠來講都係整母乳皂比較實際，但上網睇過代製母乳皂價錢唔平，如果整一次半次用來做紀念還好，好似艾菲咁真係諗住整來長用嘅，睇來無幾千蚊都成唔到事，咁慳家嘅艾菲當然主力研究自己DIY嘅可行性啦，所以好早之前已經喺圖書館借咗兩本書返來。



睇完書，上過DIY護膚品嘅速成班，再上網睇咗D片，發現整母乳皂其實唔難，但需要D時間同技巧，亦需要一堆專用嘅工具（因為整過皂嘅工具唔可以再用來煮食），為怕自己縮沙打退堂鼓，之前淘寶時好順手咁淘咗一堆工具同模落來，又專登去億世家買咗個平價手提攪拌器（神仙棒），好﹗一切準備就緒就等東風吹啦﹗

遊戲圍欄＠淘寶

由燒腩仔出世後就開始考慮，一直再三迴避覺得可免則免，直至燒腩仔一歲時仲偷偷地慶幸無裝到，點知到BB豆豬六個月時終於失守，點解...點解...點解你要逼我哋圍豬欄﹗﹗﹗



蝸居地方有限，艾菲同米高一直有共識，屋企D無謂嘢少一件得一件，好似遊戲圍欄呢D大型得來又唔係用得好耐嘅家具，我哋真係好唔想放喺間屋到，想當年燒腩仔無咁早識爬，到識爬時亦只係跟住艾菲走，最鐘意喺廚房門口睇艾菲煮飯，頂多係爬去偷吓檸檬茶，所以只喺廚房同洗手間裝門欄已經OK，我哋又點會估到幾年後會遇著進擊的BB豆豬，未五個月就識爬不突止，仲要專向危險嘅地方出發，最愛洗手間張地氊同客廳把風扇，有次艾菲入廚房睇一睇火出來，佢個口已經咬住咗條電線﹗﹗﹗又有次又係入廚房半分鐘出返來，個廳空無一人嚇到個心離一離，原來佢爬咗入哥哥房搞雜物﹗嗰一刻艾菲就知道有D嘢係無得避嘅...



研究咗一輪之後，真心覺得網床唔係好啱我哋，皆因客廳再無多餘嘅空位，平日燒腩仔同BB豆豬兩個share張playmat已經有D逼，再放張網床喺到燒腩仔就會無晒位玩，又有諗過韓國可以摺成波波池款嘅playmat，但價錢貴不在講，個波波池睇落亦唔多阻到BB豆豬嘅去路幾耐，咁唯一可以揀就係遊戲圍欄，但原來香港宜家只係得返韓國遊戲圍欄賣，即膠質好似水馬一舊舊嗰款，圍完之後個廳應該會好逼，而且感覺好膠唔係艾菲杯茶，於是上淘寶搵返啱心水嘅木圍欄。

七個月

Hello!我今日七個月大啦﹗無乜幾何媽媽可以準時出到blog，所以笑得特別燦爛囉﹗



由我足半歲嗰日開始，媽媽就畀我食糊仔，不過我初頭唔係好識吞，媽媽仲以為我唔鐘意食嘢，不過練咗一個星期之後我就pick up到吞嘢嘅技巧，仲識拍枱追嘢食同叫媽媽餵快D添，最近呢個星期已經進展到食粥仔，平均20分鐘會食完一碗粥，除咗正餐之外間中佢都會畀D甘荀條同咬咬樂我玩BLW，短短一個月我已經食過蘋果，雪梨，香蕉，甘筍，南瓜，蕃茄，菜芯，薯仔，雞肉同豬肉，so far係菠菜唔係好受得，食完噴射式咁嘔返出來之外，其他全部無問題。

媽媽見我固體進展都理想，呢兩日就正式同我轉咗食兩固，宜家「正常」來講一日四奶兩固，唔正常時半夜醒兩轉要食多兩餐，最唔正常係媽媽上星期初腸胃炎，我成日keep住每隔兩個幾鐘就食一次（艾菲：連半夜都係咁﹗即我病咗但完全無得抖﹗估係因為戒口無乜食嘢飲水所以佢唔夠飽）， 媽媽話成功由八餐轉到六餐，體重keep到喺自己條生長線到，佢已經好滿意（艾菲：但如果可以轉到三奶兩固會更好囉）。

Red Bull飛行日2016

上星期五晚上網時，忽然畀艾菲發現星期日就係Red Bull飛行日，見地點喺郵輪碼頭近住我哋，燒腩仔又應該會幾鐘意睇，同米高夾咗踢波比賽時間唔撞就即刻登記去玩，眼見星期六忽然降溫又落晒大雨仲以為無得去，點知一覺瞓醒竟然係大晴天，咁就梗係即刻gogogo啦﹗



一入場遠遠就望到呢個Red Bull嘅booth，不過艾菲想搵嘅Red Bull送你一對翼嘅車就唔見。

秋高氣爽去行山~魔鬼山>藍田公園（part 2）

上回講到輕輕鬆鬆行完魔鬼山，米高就問我哋走人定繼續，艾菲一聽到「好快」落返藍田公園，可以畀燒腩仔玩吓滑梯做奬勵， 即慈母上身決定繼續，點知過咗澳景路一上五桂山，眼前出現嘅只有無窮無盡嘅樓梯同樓梯﹗﹗﹗過咗山腳位涼亭後仲要全部都係崎嶇不平嘅山脊路﹗﹗﹗艾菲出發前同米高講好嘅行山BB班去咗邊呀？？？



艾菲揹住BB豆豬行呢段山脊路堅係十萬個辛苦（定痛苦？），行到腰斷腳軟咁滯都仲未見到山頂，期間真係頂唔住要坐低休息咗兩三次，反而燒腩仔就好叻仔，無扭無嘈拖實米高一步一步行上去，不過又公道D講，呢邊D風景確係靚D，可以望到郵輪碼頭同對面海，而山嘅另一邊就望將軍澳。

秋高氣爽去行山~魔鬼山>藍田公園（part 1）

自從上次由山頂行到去HKU後，艾菲唔知點解有個心癮好想再去行山，然後眼見燒腩仔呢個星期keep住扭扭擰擰超級煩，真心覺得要帶佢出去郁動多D放咁D電，於是啱啱個星期日又挑起條根，叫米高帶我哋去行山，然後佢就話帶我哋去行佢細個成日行嘅衛奕信徑第三段，即由魔鬼山行去藍田公園。



原先我哋想八點就出發，早D行完早D去藍田食飯行吓街再返屋企休息，點知...BB豆豬呢晚唔知做乜不停醒，醒咗餵完佢又唔肯瞓返，結果艾菲攰到八點先起到身，再之後燒腩仔個肚又有少少唔舒服，一波三折後終於搞到十點先出到門口，去埋油塘大本型食少少嘢，十一點先到起點。



一開初係行呢D石級路，望落都OK易行，加上呢日天陰陰無乜太陽又有少少風，其實都行得幾舒服，點知少爺兵燒腩仔行咗無十分鐘就開始發作，又話肚痛又話熱又話痕仲扭埋抱，即係咁...艾菲揹住BB豆豬行上去都行到索晒氣，仲要應酬佢D臭脾氣，堅係諗過返歸調頭走㗎啦，好彩最終都成功氹到佢繼續行。

朝聖＠Lego Store

作為一個隱蔽Lego迷，除咗成日導燒腩仔砌lego之外，艾菲早就想帶佢去朗豪坊間Lego Store朝聖，不過聽聞鋪頭新開張好熱鬧，甚至要排隊先可以進場就怕怕，一直拖到啱啱個星期六，真係有事要去旺角走一轉（基本上宜家無乜嘢都唔會出現旺角），抱住逼死把就嘅心終於一家大細殺咗上去。



幾經辛苦先揹住BB豆豬同拖住燒腩仔穿過樓下嘅人群入到朗豪坊，上到四樓中庭位就見到大大個Lego城堡，人流無想像中咁多喎，而且幾個主要影相位都有職員喺到維持秩序，排一陣隊就到我哋影呢架Lego馬車啦﹗Good!



影完馬車當然要影埋Lego聖誕樹啦﹗艾菲真心覺得好靚呀﹗

九龍城區防火教育同樂日

兩年前去過自己區嘅防火安全推廣日後，一直好想再帶燒腩仔去玩，可惜上年遇著米高要返工夾唔到時間，到今年米高又係撞晒時間，唯有退而求其次喺上星期日去咗九龍城區個防火教育同樂日，不過唔知係唔係因為越來越多家長知道呢D活動好玩，定還是九龍城區比較多人嘅關係呢，個活動兩點開始，我哋兩點鬆D去到已經人山人海，每個遊戲都大排長龍﹗



未入公園已經見到條人龍，都未知係玩咩米高即拖住燒腩仔埋去排隊，排咗差唔多九個字先終於到燒腩仔，原來係排隊同救護員叔叔喺救護車影相，喺警車，消防車同救護車三款車之間，燒腩仔最like就係救護車，所以排咁耐佢都無乜怨言，不過就唔肯帶佢哋頂紅色安全帽又唔肯著件反光衫，只係肯帶頂cap帽來影囉﹗



排救護車期間台前做緊表演，燒腩仔猛話想睇，但米高去咗幫佢排彈床，得艾菲揹住BB豆豬同佢排，無可能畀佢行開去睇，但好彩有一個環節係扮救火，消防員著齊裝備升起雲梯埋去台前，個個小朋友包括燒腩仔都睇到眼定定呢﹗

六個月

Happy Birthday to me, Happy Birthday to me, Happy Birthday to me, Happy Birthday to me! 媽媽話我終於夠半歲，而且去咗聯合醫院見兒科醫生兼磅重， 宣布我追磅大成功，體重達標不特止仲爬返上之前條成長線，所以喺前一個星期六，即我半歲當日買咗個蛋糕返來同我慶祝，不過個蛋糕我都無份食嘅，枝爉燭仲極速地畀哥哥吹咗添，你哋到底係慶祝緊邊個生日㗎...



呢個月我繼續全人奶放題，只係戒咗半夜餐夜奶，一日埋身食足八餐，每次大概十至十五分鐘啜晒兩邊就放口，媽媽話我宜家體重回覆返正常，來緊開始食固體之後應該會慢慢減餐，佢宜家半夜仲有起身泵奶，泵出來嘅奶會畀哥哥早餐時飲，如果有事要出街就留起180-200ml畀我用樽飲一餐（艾菲：但佢用樽飲得麻麻，有時飲120ml就停口），佢話只係眼瞓D但無乜壓力算係餵得好舒服，不過都考慮緊泵到我之後食到兩餐固體就停泵。

賀壽元朗遊

上星期三係米高生日，由於正日大家要返工返學，艾菲又有私務忙緊，所以主角話留返之後嘅星期日先慶祝，仲好貼心咁揀埋去元朗食壽司唔使艾菲煩食咩，艾菲見反正要入去食晚飯，不如早D出發搵D嘢玩，於是一家大細去咗錦上路跳蚤市場同環保農莊。



我哋呢日又係食個late breakfast就出發，錦上路跳蚤市場喺正西鐵站出面位置超方便，雖然賣嘅嘢唔係好吸引到我哋，但勝在唔多人又有D位坐，都算係幾好行，美中不足係呢日個天無乜風，比預期中有D悶熱。



我哋一到埗行咗無耐，忽然就有個叔叔送咗枝泡泡畀燒腩仔（因為佢個小朋友太細唔識玩），由於個泡泡樽蓋爆咗，為免拎住唔方便，我哋就行去空地玩咗先。

秋高氣爽去行山~山頂>HKU

啱啱個星期日天氣好好，少少涼唔太曬又有風，艾菲唔知挑起邊條筋忽然想郁動吓，於是提議去山頂行山落HKU，難得米高唔介意辛苦話好（皆因佢要負責拎袋拎車），咁我哋食完個late breakfast就出發啦﹗



艾菲初時以為要揹住BB豆豬行，但米高話呢段路全程無樓梯可以推BB車，咁艾菲就可以輕鬆D free返對手出來幫佢兩兄妹影吓靚相，Good﹗

多事之秋（純呻）

自從BB豆豬出世後，屋企一連發生咗好幾單麻煩事，最經典嘅爆煤氣爐事件大家應該仲記得，然後有燒腩仔婆婆喺百日宴前一排忽然跌親，同埋一大堆零零星星例如新飯煲無端端燒咗個底板要整，同冷氣機滴水之類唔死得人但又要你搞一輪嘅事，直至上星期黑雨時睡房大滴水要急急搵人來睇已經有D燥底，以為輕易搞掂漏水之後可以透一透氣，點知早兩日接完燒腩仔放學返來，就有人叮噹㩒我哋門鐘...

「你好呀，我哋煤氣公司緊急維修㗎」，一聽到呢句艾菲個心都沉一沉，然後佢第二句就話我哋對面屋漏煤氣，「吓﹗﹗﹗」係艾菲即時反應，當時全屋只得艾菲一個大人，一個放學返來做緊功課，另一個飲完奶扭緊抱，有咩事艾菲邊走得切？好彩佢話已經熄咗對面屋大掣，但因為搵唔到業主，想借我哋屋企來check吓D嘢姐，重申我哋呢邊絕對安全。

以為借完地方畀佢哋檢查就OK，點知隔咗一個鐘左右大門再次響起叮噹聲，今次煤氣公司職員同我哋講，對面屋返咗來但檢查完唔係佢哋漏煤氣，所以佢要再借我哋屋企望吓係唔係大喉漏，OKOK，影響唔到我哋嘅，艾菲借一借個地方畀你又有咩所謂，然後睇咗一輪發現係樓上一層嘅大喉生鏽漏，管理處即話相信要搭棚整。

果然到第二日中午，煤氣公司就有人喺我哋廚房出面搭棚，一輪鑽牆聲之下難得BB豆豬都瞓到個晏覺，艾菲以為好快搞掂無事之際，呢日湊完燒腩仔放學返來，又有人來㩒門鐘叮噹，又係煤氣公司嘅職員...

「我哋師傅喺出面整緊喉，佢望到你哋外牆條煤氣喉生鏽，建議你哋換咗去，想睇吓你會唔會趁宜家有個棚喺到一次過做埋」，無知嘅艾菲心諗外牆條喉你要換咪換囉，最多停一日煤氣姐，點知問落先知除咗停煤氣，仲要連屋入面駁住外牆至錶位條喉都一齊換，即廚房喉位塊磚一定會裂開兼事後要抹一大輪嘢，而且維修費係要業主畀錢整，承惠二千幾蚊，仲話已經平咗搭棚嘅二千五大元﹗

咁大件事當然要同米高商量咗先可以做決定啦，大家都有同樣嘅疑問到底有無需要，整一整無幾千仲要抹餐懵，可以的話多一事不如少一事，不過問極職員都只係話宜家發現有生鏽，好難講幾時會漏，但到有事時屋內閂大掣都阻唔到佢漏，要閂大喉全座停先得，而且到時要畀埋搭棚錢肯定仲貴。

聽落好似好危險，我哋又有大有細成日喺屋企，重點係短期內我哋都未必會賣樓換屋，雖然感覺有D「焗豬扒飯」feel，米高亦有懷疑過佢哋係唔係係人都叫你換，但安全至上都係搏唔過，結果就係決定畀錢煤氣公司整啦﹗

成件事唯一好彩嘅係艾菲嫁著個有擔帶嘅老公，米高為怕BB豆豬留喺到會受影響，問都無問過艾菲就安排咗燒腩仔爺爺來幫手，然後吩咐艾菲帶埋BB豆豬同燒腩仔返娘家，仲拍晒心口咁話佢會通宵抹返乾淨個廚房，呢D老公真係邊到搵吖（落多幾錢力讚吓先﹗）﹗

其實上次爆爐時燒腩仔婆婆真係講得好啱，屋企多個人自然多D麻煩嘢搞，再加上間屋住咗咁多年，D電器傢俬陸續有D小問題，有D嘢真係避無可避，最緊要屋企大小平安小小破財就當擋災囉（但實情都好肉痛，嗚...>.<），希望短期內唔好再有呢D咁經典嘅嘢來煩啦，我哋湊住兩個大小魔怪已經夠晒忙，再來的話真係唔多受到刺激㗎啦﹗

邏輯思維訓練玩具＠淘寶

生完妹妹之後又搞百日宴，月頭時又搞燒腩仔生日會，艾菲呢排明明密密淘，好似淘極都仲有嘢未淘，但睇返之前D blog，對上一次淘寶分享原來已經係一月嘅事，真係要快D開心share出來，再迎接之後D淘寶先得﹗



今次主打想推介嘅，就係呢個叫做五顏六色嘅邏輯思維訓練玩具，事源有日同燒腩仔去sogo行街，畀佢試玩咗左邊個波子路軌，見佢玩到唔捨得走，艾菲就一時心軟，決定淘個老翻畀佢玩（正版要過千蚊實在唔捨得買呀﹗>.<），然後睇吓睇吓見到右邊呢個五顏六色嘅遊戲，有D難度又幾得意，重點當然係唔貴（37蚊人仔咋﹗），就順便淘埋返來玩。



拆盒之後會有一堆印咗唔同圖形嘅硬膠片，一個放膠片嘅底座，同埋一本書仔，本書仔分唔同level，印咗好多唔同圖形組合畀你挑戰，你要喺膠片堆入面搵返適當嘅圖形膠片，再喺底座到砌返書仔嘅圖形出來，砌嘅時候除咗要搵啱圖形，仲要放啱先後前序，所以都幾考大家嘅邏輯思維同空間感，呢個遊戲可以一個人玩，又可以成班人一齊玩，唔識可以參考返書仔後面嘅答案。

DIY母乳cream

之前BB豆豬唔肯埋身食奶，艾菲做咗兩個幾月全泵媽，儲落D冰奶唔覺唔覺就霸咗四分一個冰箱，隨住時間一日一日咁過，大部分冰奶都已經過期，實在要諗吓辦法清咗去，見燒腩仔D濕疹時好時壞，暑假時已經豪咗幾十包畀佢浸浴，不過長遠計好難持續落去，於是艾菲就諗到整母乳皂，然後上網研究咗一輪，再同朋友仔去咗上一個速成DIY護膚品嘅堂，發現要做皂要D時間同技巧，但呢個世界有另一樣嘢叫母乳cream，相對簡單易做亦應該幫到燒腩仔。



DIY母乳cream所需嘅材料唔多，主要係母乳同植物油（椰子油，甜杏仁油，橄欖油，葡萄籽油，基本上咩油都得），再加蜂蠟，維他命E油同香精（唔介意無味可以唔加），配方係網上搵返來，比例係母乳6 : 植物油6 : 蜂蠟1，艾菲見燒腩仔本身都搽開椰子油加甜杏仁油，宜家只係將母乳撈埋落去，所以即刻買料試整。

而下面呢個就係艾菲試咗兩次後得出嘅自家配方：

母乳  90ml
椰子油  30ml
甜杏仁油  60ml
蜂蠟   15ml
維他命E油  幾滴

兔女郎＠Day161

好多人都話細嗰個會少D相，因為有過頭一胎嘅經驗少了新鮮感，亦因為照顧兩個小朋友實在太忙太攰，的確作為家中第三個小朋友，艾菲本個人相簿比起家姐阿哥嘅係薄好多，燒腩仔婆婆無奈話「湊住三個邊得閒同你影咁多相」...

好彩嘅係艾菲係個鐘意影相嘅媽媽，又好彩艾菲兩個小寶貝係生於唔使計住菲林曬相錢嘅數碼時代（亂影一百幾十張總有幾張OK嘅），更加好彩嘅係兩兄妹年齡相距遠哥哥去咗返學我哋就有段母女獨處嘅時光，所以BB豆豬嘅出鏡率絕對唔比哥哥低，艾菲堅係一得閒無聊mood到就舉機同佢影吓相，只係每次都要快手完事而無再好似當年咁好雅興set晒背景放齊道具來影。



就好似呢晚哥哥瞓咗，米高咁啱返夜未返到屋企，忙完一日做晒家務又未夠鐘瞓，兩母女無嘢好做就捉BB豆豬影吓相啦﹗

宜家識趴喺到唔使成日影佢瞓喺到咁悶，個樣望落即刻大個咗好多， 連塊面都漲爆咗咁（其實都堅係肥咗嘅），不過就甩晒頭髮好唔女仔囉，哈哈...



之前同佢去完Sens影相，又睇過親友幫佢影完send返來嘅相，真係發現有D角度同眼神係要阿媽先會影到。

忽然野餐＠佐敦谷公園

燒腩仔生日後雖然係一連三日長假，但一日係艾菲嫲嫲大壽，一日係重陽節，所以實際只係得返一日時間去玩，一早就同米高商量有咩活動同個仔補祝生日，結果佢竟然答艾菲同佢喺屋企睇Formula E直播，話無乜幾何香港有得睇，燒腩仔咁鐘意車實鐘意喎...（你自己鐘意咋嘛...）

直接問壽星仔意見，傻更更嘅燒腩仔當然答好，但實情係佢睇咗陣已經無興趣走咗去玩車（好彩當日反對米高買飛帶佢入場睇，如果唔係兩父子鬧住交返來就慘），好彩有知佢心意嘅艾菲堅持睇完直播，等BB豆豬瞓醒晏覺就去佐敦谷公園野餐兼放電。



話明野餐，當然要有嘢食啦，不過臨時臨急又成四點先出發，艾菲只係隨手喺屋企堆零食到揀咗D現成嘅零食帶去，有生日會食剩嘅爆谷，屋企常備韓國紫菜（當日出院時兒科醫生叫艾菲隔日就食一包幫D奶補碘），Qoo芒果汁，仲有艾菲自私食嘅辣味紫菜薯片（最近愛上蜂蜜牛油同呢隻味，但至愛始終係熱浪:P）。



鋪好野餐墊一埋位當然第一時間就食啦，雖然呢日全個草地都係人，不過有涼風吹住又無乜太陽曬，呢個下午茶確係食得好爽YY。

四歲啦﹗

YEAH！日等夜等等足一年，終於等到我四歲生日嘅大日子啦﹗



媽媽照例喺生日前一晚同我食生日蛋糕，仲派妹妹做代表同我唱生日歌慶祝生日。



今年生日正日係星期五來，我都係要如常去返學，但媽媽就破例放低屋企堆家務，一早起身即叫我畫一幅畫，然後就帶咗我去郵局寄返畀自己（咁啱佢生日呢日係love post day可以免費寄一封信），再帶我去食返餐好慶祝吓﹗

Mini生日會番外篇之整爆谷

今年生日會，艾菲著眼點唔再係點布置或者DIY，而係點樣可以令燒腩仔參與更多，於是諗到叫佢同艾菲一齊準備回禮小食爆谷，多謝大家來同佢慶祝生日，而佢都好爽快即時話好，仲興奮到一早喺電話到話咗畀婆婆知佢會整爆谷，等艾菲想話畀個驚喜大家都唔得，哈哈...



整爆谷，最重要當然係呢D乾嘅玉米粒，份量隨意就OK，艾菲爆爆谷個煲只得26cm，所以每次大概落半碗嘅份量（呢個量爆出來大概係戲院standard size嘅量）。



先落牛油（份量都係隨意一大舊），再開火慢慢將舊牛油溶咗去，今次係燒腩仔第一次埋爐邊煮嘢食，艾菲全程要喺側邊家長指引先放心，好彩佢都好合作無手多多同肯跟足艾菲指示去做。

Mini生日會

燒腩仔轉眼就四歲，一如往年艾菲都係安排喺婆婆屋企同佢開mini生日會，而早於九月初艾菲已經開始籌備，但唔知大家有無發現，今年嘅布置同上年嘅幾乎一模一樣﹗



事源艾菲今年諗到頭都爆，真係諗唔到用咩theme做主題好，鐘意《Cars》嘅燒腩仔至今仍未變心，難得上年婆婆又幫艾菲將D生日banner keep得好好，與其每年花錢訂一套新，不如做些少手工沿用返上年嘅舊banner，只係買枱布餐具呢D必須品就算。