四歲啦﹗

YEAH！日等夜等等足一年，終於等到我四歲生日嘅大日子啦﹗



媽媽照例喺生日前一晚同我食生日蛋糕，仲派妹妹做代表同我唱生日歌慶祝生日。



今年生日正日係星期五來，我都係要如常去返學，但媽媽就破例放低屋企堆家務，一早起身即叫我畫一幅畫，然後就帶咗我去郵局寄返畀自己（咁啱佢生日呢日係love post day可以免費寄一封信），再帶我去食返餐好慶祝吓﹗



返到學校有老師同同學仔唱生日歌畀我聽，放學又有媽媽同妹妹親自來接，仲畀我同另一個同年同月同日出世嘅同學仔喺學校玩咗陣先走，返到屋企仲唔使做功課住，放低書包即出門口去會合爸爸一齊食火車壽司，雖然等位嘅時間仲耐過食嘅時間，但我對爸爸呢個安排超滿意囉﹗哈哈哈...



媽媽話我難得出場，叫我順便update吓自己嘅發展，咁就等我由食方面開始講起，呢半年嘅胃口係越來越差，基本上每餐食半碗飯都嫌多，體重已經keep住四個月零增長，有汁撈會食得好D，但其他要咬嘅肉就會食得好差，菜更加要逼先肯食，好彩嘅係我依然係為食底，對於一切水果零食果汁毫無抗御能力，但食之前會問准大人。



講完食就到講瞓覺，平日返學大概九點半就上床瞓覺，碌十五分鐘左右會瞓著，直至第二朝九點幾十點先起身，媽媽因為要照顧妹妹唔一定晚晚陪到我瞓，但就派咗伍餐肉哥哥代佢陪瞓，不過每次媽媽真係陪唔到我時，我都係會扭擰一輪唔願瞓，想逼媽媽回心轉意陪返我...

妹妹出世前後我因為未慣，成日半夜起身喺到發脾氣，再搞成粒鐘先肯瞓返，但隨住我適應咗妹妹嘅加入，已經叫做瞓得好咗，不過呢排返學升K2功課壓力大咗，又多返半夜醒嘅情況囉...



活動能力繼續有進步，雖然行路同跑步時仲係成日因為唔專心而跌，但宜家上落樓梯已經好smooth，甚至識得跳級嚇死媽媽，去公園又肯玩D要擒同靠平衡力行嘅玩意，至於小手肌發展始終係弱D，宜家K2要開始揸筆寫字，間中會出現吊手嘅情況，不過就終於喺啱啱過去嘅暑假，畀爸爸媽媽逼我學識用鉸剪同自己開食物包裝袋。



認知能力依然強勢，D嘢基本上一教就記得，忽然自己學識10以內嘅加數，認字能力更加係超高，中文字已經唔覺唔覺進展到睇得明媽媽D簡短Whatsapp message（識部分字再靠估去估埋其他字嘅意思），就連最弱嘅英文都唔再係文盲level，開始認得學校同睇書學過嘅英文字。

開始同K2班同學仔混熟，比K1時乖咗識守規矩坐得定咗，放學返屋企後依然會同媽媽講好多學校嘅嘢，會不停唱學校D兒歌，但就成日大頭蝦唔記得老師話要帶咩（K2之後唔再寫手冊提帶咩），同埋做功課時成日做到遊晒魂咁，搞到媽媽每日都好勞氣。


自理能力基本上無乜點變，依舊係自己著衫除衫，沖涼繼續自己捽梘，會主動話去洗手間，poo完識自己抹pat pat，基本上都好獨立可以自己照顧自己，爸爸媽媽只需要旁喺側邊必要時先出手，另外我仲熱愛做家務，每餐開飯前會搶住去拎飯拎餐具，食飽又識自己收返D碗筷入廚房，會主動執返跌咗落地D飯餸，有時仲會扭媽媽畀我幫手洗菜，簡中又會主動幫妹妹丟片。



最後又講到情感發展，媽媽話我除咗忽然黐媽，同間中會有分離焦慮之外，呢半年係睇得出嘅進步，明顯做咗哥哥之後乖咗，唔緊唔緊咁其實都好緊張好錫妹妹，雖然仲係會日嘈夜嘈扭埋晒D無謂嘢，但心知自己唔啱好快就會自己收火同認錯道歉，無再好似以前咁蠻不講理，發起脾氣時依然難頂，不過就少咗郁手郁腳同大叫。

媽媽話有樣嘢好希望我可以改，就係當我唔想做某D嘢而大人又逼我做時（例如物理治療同睇醫生），我會固意搞事超唔合作，佢話我知呢個世界唔係每樣嘢都可以揀，有時D嘢唔鐘意都要做，教我要學識去接受，積極D快D完成仲好，而且佢好希望我學習點同小朋友相處，唔好再講嘢招招積積，或者做D令人討厭嘅行為來引人注意，否則遲D真係難保我會畀小朋友打喎。