好彩嘅係艾菲係個鐘意影相嘅媽媽，又好彩艾菲兩個小寶貝係生於唔使計住菲林曬相錢嘅數碼時代（亂影一百幾十張總有幾張OK嘅），更加好彩嘅係兩兄妹年齡相距遠哥哥去咗返學我哋就有段母女獨處嘅時光，所以BB豆豬嘅出鏡率絕對唔比哥哥低，艾菲堅係一得閒無聊mood到就舉機同佢影吓相，只係每次都要快手完事而無再好似當年咁好雅興set晒背景放齊道具來影。
就好似呢晚哥哥瞓咗，米高咁啱返夜未返到屋企，忙完一日做晒家務又未夠鐘瞓，兩母女無嘢好做就捉BB豆豬影吓相啦﹗
宜家識趴喺到唔使成日影佢瞓喺到咁悶，個樣望落即刻大個咗好多， 連塊面都漲爆咗咁（其實都堅係肥咗嘅），不過就甩晒頭髮好唔女仔囉，哈哈...
之前同佢去完Sens影相，又睇過親友幫佢影完send返來嘅相，真係發現有D角度同眼神係要阿媽先會影到。
影影吓忽然醒起屋企有個兔耳仔頭箍，趁佢未有反抗能力幫佢帶來扮吓兔女郎先﹗
Hi! 個樣八八卦卦咁好搞笑，實情係佢開始趴到攰不停跌，艾菲要顧住個兔耳仔，又要努力引佢笑，最終只係影到呢張突然彈出來咁嘅樣。
見佢唔多頂得住，都係畀返張bumbo chair佢坐，帶咗頭箍個樣即刻女仔返，所以話打扮對女仔來講係幾咁緊要呢，艾菲呢個hea媽要緊記唔好搞到個女爛爛撻撻咁先得﹗
相對哥哥宜家反而影少咗靚相，一來燒腩仔開始大個識反抗無來合作，二來艾菲少咗機會同佢獨處，好多時顧得妹妹來已經無咩閒情影哥哥（影相真係好講mood嘛），所以難得上星期打風學校停課，三個人大被同眠瞓咗個晏覺心情好，即捉住佢兩個畀艾菲影返張兄妹合照先﹗
沒有留言:
張貼留言