直接問壽星仔意見，傻更更嘅燒腩仔當然答好，但實情係佢睇咗陣已經無興趣走咗去玩車（好彩當日反對米高買飛帶佢入場睇，如果唔係兩父子鬧住交返來就慘），好彩有知佢心意嘅艾菲堅持睇完直播，等BB豆豬瞓醒晏覺就去佐敦谷公園野餐兼放電。
話明野餐，當然要有嘢食啦，不過臨時臨急又成四點先出發，艾菲只係隨手喺屋企堆零食到揀咗D現成嘅零食帶去，有生日會食剩嘅爆谷，屋企常備韓國紫菜（當日出院時兒科醫生叫艾菲隔日就食一包幫D奶補碘），Qoo芒果汁，仲有艾菲自私食嘅辣味紫菜薯片（最近愛上蜂蜜牛油同呢隻味，但至愛始終係熱浪:P）。
鋪好野餐墊一埋位當然第一時間就食啦，雖然呢日全個草地都係人，不過有涼風吹住又無乜太陽曬，呢個下午茶確係食得好爽YY。
至於BB豆豬就要等我哋食完先到佢開餐，無嘢做就畀佢碌吓草地先，第一次喺戶外地方碌，表現明顯有D緊張，唔太敢掂D草。
專登叫米高抱佢企起身望真D個環境（嘻...艾菲真心鐘意佢呢個野餐look，個喱士蝴蝶headband又係艾菲自己整㗎﹗）。
話咁快已經摸熟環境不停碌，睇佢個樣仲招招積積咁，哈哈...
燒腩仔食飽就埋來同妹妹一齊碌。
泡泡槍又係野餐必備之物啦﹗我哋一叫燒腩仔射多D泡畀妹妹睇，佢即超積極咁不停㩒掣。
而BB豆豬都相當畀面，睇哥哥射出來D泡泡睇到勁興奮。
見差唔多天黑就執嘢走，安排燒腩仔負責睇住妹妹，然後呢兩兄妹就旁若無人咁痴纏起來。
喺等燒腩仔嘅期間，我哋都畀BB豆豬試sir咗兩次滑梯（抱住慢慢sir），不過就無乜反應仲未識玩囉...
好似無特別做過咩咁，但走嘅時候問燒腩仔都話好開心，仲話下次一齊再來野餐添，小朋友嘛...有得吃吃喝喝跑跑跳跳就夠，真係特別容易滿足呢﹗
雖則hea吓hea吓就過咗個生日同長假期，不過艾菲都特登喺啱啱過咗嘅星期日book定位，帶佢去哈根大師到high tea，當係佢生日嘅最後一擊慶祝活動，然後三個人share六小球雪糕同兩層甜品水果，幾乎飽到唔使食晚飯呀﹗
沒有留言:
張貼留言