今次主打想推介嘅，就係呢個叫做五顏六色嘅邏輯思維訓練玩具，事源有日同燒腩仔去sogo行街，畀佢試玩咗左邊個波子路軌，見佢玩到唔捨得走，艾菲就一時心軟，決定淘個老翻畀佢玩（正版要過千蚊實在唔捨得買呀﹗>.<），然後睇吓睇吓見到右邊呢個五顏六色嘅遊戲，有D難度又幾得意，重點當然係唔貴（37蚊人仔咋﹗），就順便淘埋返來玩。
拆盒之後會有一堆印咗唔同圖形嘅硬膠片，一個放膠片嘅底座，同埋一本書仔，本書仔分唔同level，印咗好多唔同圖形組合畀你挑戰，你要喺膠片堆入面搵返適當嘅圖形膠片，再喺底座到砌返書仔嘅圖形出來，砌嘅時候除咗要搵啱圖形，仲要放啱先後前序，所以都幾考大家嘅邏輯思維同空間感，呢個遊戲可以一個人玩，又可以成班人一齊玩，唔識可以參考返書仔後面嘅答案。
收貨後第一時間畀燒腩仔試玩，個遊戲睇落都幾難，原先以為佢未必可以自己玩到，但佢竟然係估你唔到咁快就完成第一個starter嘅level﹗勁呀！
除咗邏輯思維玩具之外，艾菲另一推介就係應該好多媽媽都會淘嘅Oxford Reading Tree同點讀筆，喺燒腩仔兩歲嘅時候，艾菲已經諗過淘ORT嘅書返來畀佢睇，但見每次喺圖書館借畀佢睇都無乜興趣咁就諗住慳返，不過上年佢學校有個朗讀英文嘅活動，其中一本要讀嘅就係ORT嘅書，老師教完後佢又好似好鐘意咁喎，認得入面D主角仲肯跟住我哋教逐隻字讀，於是今年燒腩仔姨媽問佢有咩生日禮物想要，艾菲就諗到呢套書，心諗佢唔睇都仲有妹妹跟尾嘛，點計都唔會浪費嘅﹗
至於枝點讀筆，艾菲都掙扎咗成晚先決定買，因為差不多嘅價錢我哋可以買多幾個stage畀佢睇，但考慮到艾菲宜家唔可能日日抽到時間坐定定同佢一齊睇書，仲要佢自覺地去睇本身興趣無咁大嘅英文書，實在係要一D動力先做得到，見佢之前玩兩本發聲英文歌書，唔覺唔覺就學識咗好幾首英文歌，相信點讀筆都會有差不多嘅功效，而且枝點讀筆可以自己入資料落去自製點讀書，只要佢一日唔壞，艾菲又肯的起心肝去整的話，長遠來講應該係幾有用。
收貨之後燒腩仔當然係即時拎來玩，亦好快就學識點用枝點讀筆，對佢來講最好玩當然係拎枝點讀筆來聽隨筆贈送嘅Peppa Pig歌書啦，但艾菲就限定佢每日只可以玩一陣，要聽歌就要先讀兩三本ORT書，慢慢咁都推到佢去睇同跟住讀，亦發現佢嘅英文認字能力原來無艾菲想像中咁差，原來佢喺學校都有認真學習嘅，哈哈哈...
講開認字，都順便講埋呢套燒腩仔同學仔介紹嘅中文認字卡，燒腩仔學校會每個星期派返手冊講佢哋學咗咩字，艾菲通常隨手指住叫佢讀返出來就算，見佢每次評估都順利過關都無咩擔心過，不過到K1下學期，慢慢見到佢個別有D字會容易認錯（例如菜同葉），見佢升K2學嘅字應該會越來越深，所以就淘咗套字卡連字卡套返來貼喺佢房門口，艾菲定期換返佢學緊嘅字落去，等佢得閒望多兩眼加深記憶。
除咗字卡之外，艾菲仲淘咗D好怪獸家長feel嘅練習畀佢做，不過實情係開學初期學校未有功課，艾菲就搵返D好耐之前淘落嘅左腦右腦練習出來畀燒腩仔做，點知佢居然鐘意到不得了，仲主動問艾菲「我可唔可以日日都做呢D功課」，難得佢咁有興趣又確係對佢思考能力發展有幫助嘅，咁艾菲唯有再淘D返來畀佢玩，仲專登淘咗D迷宮書同找不同嘅書來訓練埋佢嘅專注力添﹗
之前淘燒腩仔生日會D餐具，咁啱見到同一間鋪頭有聖誕嘅拉旗同閃燈心口針賣，見都係幾蚊人仔咁平，就買定返來到時布置或者影相用，至於個閃燈心口針就可以留返去睇燈飾時戴，連埋表妹仔一人一個唔使爭，咁就唔使只得BB豆豬有聖誕頭飾而燒腩仔就無啦﹗
最後艾菲想介紹嘅係呢個標本相架，燒腩仔三個月時艾菲特登喺反斗城用一百蚊買咗個印掌印嘅泥連盒返來，結果喺超唔helpful嘅米高協助下印得勁醜怪，今次到BB豆豬艾菲都想同佢印個掌印做留念，見網上唔少媽媽話紙黏土都OK，於是喺十二蚊店買咗盒日本製輕黏土，裁啱size再自己慢慢印，風乾後效果真係同燒腩仔個差不多，然後就淘埋呢個只需十二蚊人仔嘅標本相架來裝，價錢差一大截，不過感覺靚過燒腩仔個好多呀﹗
沒有留言:
張貼留言