燒腩仔轉眼就四歲，一如往年艾菲都係安排喺婆婆屋企同佢開mini生日會，而早於九月初艾菲已經開始籌備，但唔知大家有無發現，今年嘅布置同上年嘅幾乎一模一樣﹗
事源艾菲今年諗到頭都爆，真係諗唔到用咩theme做主題好，鐘意《Cars》嘅燒腩仔至今仍未變心，難得上年婆婆又幫艾菲將D生日banner keep得好好，與其每年花錢訂一套新，不如做些少手工沿用返上年嘅舊banner，只係買枱布餐具呢D必須品就算。
呢日我哋一早就返咗婆婆屋企準備，艾菲同米高負責佈置，燒腩仔就同公公婆婆一齊準備食物，之後就捉兩個小朋友瞓晏覺，但大家都明你越想佢瞓佢越唔瞓嘅情況啦，結果婆婆用咗成個鐘先扑得暈燒腩仔，到夠鐘開party佢都仲未捨得起身。
等齊人我哋就開餐啦，今年做咗哥哥梗係要介紹埋妹妹出場先可以食，而為咗配合返哥哥頂生日帽，BB豆豬都專登帶返上次百日宴個皇冠headband。
食飽小朋友就四散各自玩，今年除咗BB豆豬之外，仲有哎吔表妹仔呢個新成員加入（艾菲表妹嘅女），而艾菲最開心係見到燒腩仔越來越有哥哥格，唔使大人提都會主動同細過佢嘅小BB玩，氹到本身仲認緊地方認緊人嘅哎吔表妹仔由喊變笑。
玩到咁上下就食生日蛋糕，話說今年有個小朋友大個仔，對生日蛋糕變得好有要求，某次帶佢去食哈根大師雪糕時，畀佢見到poster介紹個火車形嘅雪糕蛋糕，佢第一時間就同艾菲講「媽媽，我生日時你買呢個火車蛋糕畀我吖」，點知生日會前兩星期去問，雪糕姐姐話呢款蛋糕已經唔會再做，燒腩仔聽到即變嬲嬲豬，為咗氹個仔開心艾菲呢個慈母就要臨急臨忘搵過第二款蛋糕，好彩最終搵到聖安娜呢個開蓬跑車蛋糕，啱晒標準車迷嘅口味。
燒腩仔：我四歲啦﹗YEAH！
切蛋糕前影返張全家幅先﹗
仲有三老表合照，你哋一齊大一齊玩，要繼續相親相愛呀﹗
唱完生日歌，壽星仔已經急不及待要即刻吹熄枝蠟燭，再手起刀落切落架跑車尾到。
最後又最重要嘅環節當然係食蛋糕啦﹗蛋糕係士多啤梨mousse cake來，比想像中好味喎，good！
承蒙大家嘅合作，今年終於無再收到咁多車，絕大部分禮物都變成食得嘅食物或者生日利是，而媽媽最like當然係姨媽送嘅ORT啦﹗
沒有留言:
張貼留言