自從BB豆豬出世後，屋企一連發生咗好幾單麻煩事，最經典嘅爆煤氣爐事件大家應該仲記得，然後有燒腩仔婆婆喺百日宴前一排忽然跌親，同埋一大堆零零星星例如新飯煲無端端燒咗個底板要整，同冷氣機滴水之類唔死得人但又要你搞一輪嘅事，直至上星期黑雨時睡房大滴水要急急搵人來睇已經有D燥底，以為輕易搞掂漏水之後可以透一透氣，點知早兩日接完燒腩仔放學返來，就有人叮噹㩒我哋門鐘...
「你好呀，我哋煤氣公司緊急維修㗎」，一聽到呢句艾菲個心都沉一沉，然後佢第二句就話我哋對面屋漏煤氣，「吓﹗﹗﹗」係艾菲即時反應，當時全屋只得艾菲一個大人，一個放學返來做緊功課，另一個飲完奶扭緊抱，有咩事艾菲邊走得切？好彩佢話已經熄咗對面屋大掣，但因為搵唔到業主，想借我哋屋企來check吓D嘢姐，重申我哋呢邊絕對安全。
以為借完地方畀佢哋檢查就OK，點知隔咗一個鐘左右大門再次響起叮噹聲，今次煤氣公司職員同我哋講，對面屋返咗來但檢查完唔係佢哋漏煤氣，所以佢要再借我哋屋企望吓係唔係大喉漏，OKOK，影響唔到我哋嘅，艾菲借一借個地方畀你又有咩所謂，然後睇咗一輪發現係樓上一層嘅大喉生鏽漏，管理處即話相信要搭棚整。
果然到第二日中午，煤氣公司就有人喺我哋廚房出面搭棚，一輪鑽牆聲之下難得BB豆豬都瞓到個晏覺，艾菲以為好快搞掂無事之際，呢日湊完燒腩仔放學返來，又有人來㩒門鐘叮噹，又係煤氣公司嘅職員...
「我哋師傅喺出面整緊喉，佢望到你哋外牆條煤氣喉生鏽，建議你哋換咗去，想睇吓你會唔會趁宜家有個棚喺到一次過做埋」，無知嘅艾菲心諗外牆條喉你要換咪換囉，最多停一日煤氣姐，點知問落先知除咗停煤氣，仲要連屋入面駁住外牆至錶位條喉都一齊換，即廚房喉位塊磚一定會裂開兼事後要抹一大輪嘢，而且維修費係要業主畀錢整，承惠二千幾蚊，仲話已經平咗搭棚嘅二千五大元﹗
咁大件事當然要同米高商量咗先可以做決定啦，大家都有同樣嘅疑問到底有無需要，整一整無幾千仲要抹餐懵，可以的話多一事不如少一事，不過問極職員都只係話宜家發現有生鏽，好難講幾時會漏，但到有事時屋內閂大掣都阻唔到佢漏，要閂大喉全座停先得，而且到時要畀埋搭棚錢肯定仲貴。
聽落好似好危險，我哋又有大有細成日喺屋企，重點係短期內我哋都未必會賣樓換屋，雖然感覺有D「焗豬扒飯」feel，米高亦有懷疑過佢哋係唔係係人都叫你換，但安全至上都係搏唔過，結果就係決定畀錢煤氣公司整啦﹗
成件事唯一好彩嘅係艾菲嫁著個有擔帶嘅老公，米高為怕BB豆豬留喺到會受影響，問都無問過艾菲就安排咗燒腩仔爺爺來幫手，然後吩咐艾菲帶埋BB豆豬同燒腩仔返娘家，仲拍晒心口咁話佢會通宵抹返乾淨個廚房，呢D老公真係邊到搵吖（落多幾錢力讚吓先﹗）﹗
其實上次爆爐時燒腩仔婆婆真係講得好啱，屋企多個人自然多D麻煩嘢搞，再加上間屋住咗咁多年，D電器傢俬陸續有D小問題，有D嘢真係避無可避，最緊要屋企大小平安小小破財就當擋災囉（但實情都好肉痛，嗚...>.<），希望短期內唔好再有呢D咁經典嘅嘢來煩啦，我哋湊住兩個大小魔怪已經夠晒忙，再來的話真係唔多受到刺激㗎啦﹗
沒有留言:
張貼留言