DIY母乳cream

之前BB豆豬唔肯埋身食奶，艾菲做咗兩個幾月全泵媽，儲落D冰奶唔覺唔覺就霸咗四分一個冰箱，隨住時間一日一日咁過，大部分冰奶都已經過期，實在要諗吓辦法清咗去，見燒腩仔D濕疹時好時壞，暑假時已經豪咗幾十包畀佢浸浴，不過長遠計好難持續落去，於是艾菲就諗到整母乳皂，然後上網研究咗一輪，再同朋友仔去咗上一個速成DIY護膚品嘅堂，發現要做皂要D時間同技巧，但呢個世界有另一樣嘢叫母乳cream，相對簡單易做亦應該幫到燒腩仔。



DIY母乳cream所需嘅材料唔多，主要係母乳同植物油（椰子油，甜杏仁油，橄欖油，葡萄籽油，基本上咩油都得），再加蜂蠟，維他命E油同香精（唔介意無味可以唔加），配方係網上搵返來，比例係母乳6 : 植物油6 : 蜂蠟1，艾菲見燒腩仔本身都搽開椰子油加甜杏仁油，宜家只係將母乳撈埋落去，所以即刻買料試整。

而下面呢個就係艾菲試咗兩次後得出嘅自家配方：

母乳  90ml
椰子油  30ml
甜杏仁油  60ml
蜂蠟   15ml
維他命E油  幾滴



量好晒所有材料後首先將蜂蠟同植物油放喺同一個玻璃杯到，然後隔熱水將蜂蠟溶化，直至完全溶化（即變透明色）就可以拎出來，加幾滴維他命E油再攪勻。



最後就係加母乳落去快手攪勻，見佢開始成cream狀就OK㗎啦﹗



搞掂就可以入盒裝起佢。

注意1：所有用具用之前要洗乾淨，艾菲就跟老師教用消毒火酒抹一次先用
注意2：入盒後要放雪櫃保存，可以放到三個月，不過燒腩仔每日早午晚全身密密搽，我哋唔使一個月就用完
注意3：呢個份量大概可以做到三盒50g嘅cream
注意4：椰子油比較易凝固，所以第一次落40ml時雪完比較硬身難推，第二次只落30ml就似cream多D，理論上落少D會易推D，不過椰子油對燒腩仔濕疹有幫助（之前試過搽好多唔同嘢，唯獨椰子油佢話搽完無咁痕），艾菲就盡可能都keep返個比例多D

整完之後艾菲即刻畀燒腩仔試，由於佢知呢個cream係專為佢而設，而且雪完搽落身涼浸浸好舒服，燒腩仔係爆like咁猛叫艾菲同佢搽多D，又嫌BB豆豬搽咗佢D cream，每搽完一盒就用好慘嘅聲話「用完啦無得用啦」，直至艾菲話可以再整先滿意。

至於艾菲自己都貪得意搽來試吓，感覺係幾滋潤嘅，不過無搽開油就會覺得比較笠身唔係好慣，又或者冬天皮膚乾燥D時用會好D，另外都有畀BB豆豬試搽，佢哋小朋友皮膚好快就吸收晒，但佢嘅膚質似係唔多受搽油，所以佢都係用返自己專用水份較多嘅lotion，等哥哥可以獨享母乳cream。



除咗母乳cream之外，最近DIY成癮嘅艾菲，仲跟老師介紹本書嘅配方整咗紅豆磨沙膏，早排新聞話好多磨沙膏含膠粒影響海洋生態，艾菲呢個全天然配方就唔怕有呢個問題，而且成本超低又易整。

紅豆磨沙膏配方：

紅豆  80g
蜂蜜  20g
橄欖油  幾滴



首先當然係量好材料啦，為免用唔晒變壞做成浪費（磨沙總不能日日用嘛），所以艾菲只係整咗一半份量，然後將紅豆放落攪拌機打成粉粒狀，再加蜂蜜同橄欖油撈勻就搞掂可以入盒放雪櫃保存（始終係食物，感覺放雪櫃穩陣D），不過艾菲見佢撈完之後唔係好濕，就自己加多少少蜂蜜落去撈，嘻...DIY就係咁樣嘛，憑自己感覺去試最啱自己嘅配方出來。



整完即刻拎D上手試，都幾好推同用開嘅磨沙膏差不多喎，跟住第二日沖涼時仲拎咗去做全身磨沙，沖完水後D皮膚堅係滑滑咗呀﹗