整爆谷，最重要當然係呢D乾嘅玉米粒，份量隨意就OK，艾菲爆爆谷個煲只得26cm，所以每次大概落半碗嘅份量（呢個量爆出來大概係戲院standard size嘅量）。
先落牛油（份量都係隨意一大舊），再開火慢慢將舊牛油溶咗去，今次係燒腩仔第一次埋爐邊煮嘢食，艾菲全程要喺側邊家長指引先放心，好彩佢都好合作無手多多同肯跟足艾菲指示去做。
牛油溶咗之後就可以落玉米粒，輕輕炒勻佢等每粒都索滿油，慢慢炒到佢開始爆開就可以冚蓋。
之後會不停聽到玉米粒爆開嘅呯呯聲，D聲未停前千祈唔好開蓋，否則D爆谷會跳晒出來，等爆嘅期間可以搖吓個煲，盡量等多D玉米粒平均受熱爆多D，然後無聲就可以熄火開蓋，將D爆谷倒喺個鋪咗牛油紙嘅大盤到鋪平放涼先收埋，咁就可以keep到佢脆口㗎啦。
爆好爆谷之後就可以開始調味，為咗畀燒腩仔參與，除咗焦糖係艾菲親自煮理外（因為要煮同快手撈勻），其餘味道都係燒腩仔一手包辦，好簡單就咁將D海鹽呀，綠茶粉呀，可可粉呀分別倒落個食物盒到，再冚蓋畀佢狂shake就OK。
調完味當然要幫手試吓味啦﹗不過單係試味都可以試咗三分一盒去囉﹗kakaka...
最終我哋一共整咗五隻味，有鹽味，抹茶味，朱古力味，紫菜味同焦糖味，但最受歡迎同keep得最脆始終係焦糖，其次就係紫菜味。
除咗整爆谷外，艾菲仲諗咗D簡單party food畀燒腩仔喺生日會當日幫手整，首先出場嘅有哈蜜瓜串，由公公幫手切粒，燒腩仔負責穿起佢，穿夠三粒就搞掂。
緊接住出場嘅係艾菲開親大食會都想食嘅菠蘿腸仔，又係簡簡單單用牙籤桔起一串串就可以。
咁辛苦桔咗兩碟嘢食，當然要偷食返串菠蘿腸仔以示鼓勵啦，kakaka...
最後出場有薯仔沙律，又係艾菲負責個薯蓉底，然後叫燒腩仔幫手將蛋，吞拿魚，粟米粒同沙律醬撈勻就得。
有過之前三次生日會嘅經驗，我哋今次預嘅食物份量相對理想，而燒腩仔有份整嘅幾樣食物，更加係畀大家極速掃清光添呀﹗
沒有留言:
張貼留言