一如往年嘅中秋節，燒腩仔婆婆一早已經話要買燈籠同螢光棒畀燒腩仔同BB豆豬玩，但通通都畀艾菲拒絕，皆因三年中秋過後燒腩仔床尾長期掛住三個膠燈籠，玩又玩唔爛丟又太浪費，至於螢光棒就係環保問題，而且我哋連上年筒螢光棒玩到今年都仲未玩完（唉...搞到每次玩都好自責，但唔玩就咁丟咗佢都一樣污染環境呀） ，結果艾菲成功遊說到燒腩仔婆婆唔買，偏偏就係無預到燒腩仔姑姐竟然好有心，忽然買個巴斯光年飛機燈籠畀燒腩仔，咁小朋友有新燈籠當然好高興啦，日玩夜玩玩足成個中秋假期咁滯。
至於BB豆豬，太細個根本唔識拎燈籠， 買燈籠畀佢係無乜意思嘅，不過為咗應節艾菲都一早整咗條中秋headband畀佢，簡簡單單兔仔加頭花已經夠晒搶鏡，點都叫做應吓節啦（艾菲呢期沈迷緊呢D手作仔，遲D有機會再開post分享，嘻...）﹗
正當一切準備就緒，一心諗住中秋節正日，燒腩仔返學校開提燈會，米高放下午可以同艾菲一齊拍拖接放學，再去婆婆到做節食飯，偏偏就遇著中秋節可能打大風嘅消息，學校為咗小朋友唔好失望，好貼心咁將提燈會改前一日，點知燒腩仔就喺出發參加提燈會前忽然發高燒（成朝都無事好精神㗎喎，出門口前先突然同艾菲講好凍），提燈會參加唔到第二日亦同佢請咗日病假，好彩嘅係佢及時退燒，艾菲可以帶埋佢返婆婆到做節同表妹一齊玩。
中秋節當日，喺婆婆屋企食完飯，只係同表妹一齊拎住燈籠沿林村河行咗陣，到第二日追月，我哋就決定去維園綵燈會湊吓熱鬧，但可能因為天氣幾悶熱，又無帶飛機燈籠同行，燒腩仔表現無前一晚咁興奮，而BB豆豬更加係全晚呆呆咁，只係見到姨媽送畀佢枝花花螢光棒時手多多想自己拎。
今年綵燈會D花燈無預期中咁靚，我哋都係求其行一圈，影吓代表BB豆豬嘅馬騮，同叫燒腩仔喺青馬大橋前隻小兔到影張相就閃人，希望下年BB豆豬識行識走，艾菲唔使揹住佢可以影返多D靚相啦﹗
沒有留言:
張貼留言