記得同學仔媽咪講過Sens Studio唔錯，於是一直留意住佢哋嘅團購（都出得幾密，幾乎每個月有一次），然後八月終於入手join咗，然後同米高夾極九月尾十月頭嘅時間佢都唔OK，然後艾菲決定投降改喺八月中影，然後輯相就由原先燒腩仔四歲生日相變成BB豆豬100日大相（唔...其實都不過係個影相嘅藉口來姐...）。
由於艾菲坐完月後就正式一湊二，基本上日忙夜忙無事忙咁，所以book咗邊日影之後就乜都無理，著咩帶咩道具去影基本上都係去到最後幾日先求其襯，唯獨係影相前一晚忽然心血來潮自製咗對母女頭飾去影，算係好有誠意準備㗎啦﹗
影相前幾日開始同燒腩仔講，順便灌輸佢一家四口嘅concept，重點係叫佢到時要聽哥哥姐姐話，一心以為打定底實無死，仲帶定一袋糖去以備不時之需，點知...佢唔知係唔係興奮得滯，去到studio即好似上咗身咁超級hyper，瘋狂地亂跑亂跳亂摸，攝影師姐姐同助手哥哥出盡法寶都搞佢唔掂，D四人合照全部都要等佢搞一輪先影到...
至於BB豆豬呢，艾菲專登喺出發前餵飽佢，照計應該都有個半鐘嘅電力，啱啱好夠用可以捱到尾，見佢初頭表現都OK㗎，識得合作望鏡頭（但唔笑），到後期唔知係唔係無耐性，開始扁咀兼爆喊，然後開始扭抱扭眼瞓，本來攝影師姐姐想襯佢瞓著咗影返D初生BB相，但佢一放低就爆喊，連畀佢咬住奶咀都唔OK...
喺咁混亂嘅情況下，攝影師姐姐都無詐型兼盡力去影足90分鐘，艾菲真心要畀好多個讚佢（如果換轉自己實發難渣唔影），但問心失望點都有DD，我哋一年先得一次影家庭相嘅機會呀，不過又好阿Q咁同自己講，反正團購三百蚊都唔使，佢哋表現唔好出來效果唔好咪唔使加錢買相囉，仲唔使煩揀相添呀，對有選擇困難症嘅媽媽來講係好事吖﹗
結果我哋一星期後去睇相，D相比相像中好好多呀﹗不過艾菲同米高都好狠心咁out咗好多相，最後只係額外加咗六張相，本來九百蚊就搞掂輯相㗎啦，但礙於D相影唔到BB豆豬笑，而佢哋個video就有影到，仲要影到艾菲難得溫柔地氹BB豆豬嘅一面，兼夾將燒腩仔影到勁可愛（你話剪接嘅技術係幾咁重要呢:P），終於艾菲忍唔住畀多千幾蚊買咗個video，心諗反正咁耐以來都無正經同佢兩個拍過片，就當係個紀念囉，佢哋呢D樣過咗就無㗎啦（女人要買嘢總係有十萬個理由>.<）﹗
好，大家聽艾菲講咗咁耐，都係時候去相啦...
第一套衫專登襯返母女裝同父子裝，不過艾菲整對母女頭飾就唔係好搶眼囉...
呢個小朋友一去到就失拪控咁四圍搞，後面D monkey襯到佢絕﹗
呢張已經係BB豆豬唯一一張比較歡容嘅相。>.<
又係唯一一張兄妹相，唔係大嘅走咗去就係細嘅頂唔住爆喊，所以影到一張正常嘅艾菲都收貨㗎啦﹗
換套衫轉個場景再影，大家睇BB豆豬個樣開始呆啦，艾菲喺側邊點氹都零反應，至於燒腩仔就捉精靈捉上腦，不停打開個精靈球話要捉攝影師姐姐同助手哥哥。
最後BB豆豬頂唔住爆喊，我哋就快手換埋第三套衫同轉咗個白底場景，但影咗幾張一家四口相佢已經頂唔住（睇返相佢對眼當時已經喊到紅晒），而喺艾菲氹緊佢瞓時燒腩仔就繼續滿場飛。
BB豆豬唔OK，我哋就單獨同燒腩仔影吓相，成輯相入面艾菲最like呢張母子相，大家都笑得好自然感覺好sweet呀﹗
本來BB豆豬有一刻係肯瞓喺張墊到㗎，但燒腩仔又唔肯乖乖瞓低一齊影兼大動作得滯整醒咗佢，結果只係影到呢張一家四手嘅相，well...艾菲本身都好鐘意影D手手腳腳㗎，所以對呢張相特別情有獨鐘。
見BB豆豬喊到收唔到聲，攝影師姐姐都唔敢再驚動佢，於是叫燒腩仔影埋最後一個場景扮rock友彈結他打鼓，不過有人就顧住自己玩完全唔肯配合姐姐，講到人哋口水乾先影到兩三張正常嘅。
沒有留言:
張貼留言