好似呢晚煮蕃茄蛋，艾菲就先叫燒腩仔幫手打蛋，入廚房睇完艾菲點樣煎D蛋皮，攤凍後再交返畀佢幫手將D蛋皮切成長方形，起初以為佢會切到求求其其，估唔到佢又切得幾似模似樣㗎喎，唔知係因為佢D小手肌進步咗，定因為把刀好用呢（把兒童刀係今年初路過青衣間zakkaya買，十二蚊把堅係切唔傷手但又切到蘿蔔呢類較硬嘅食物，讚﹗）？
切完D蛋皮就交返畀艾菲埋尾，不過燒腩仔嘅任務仲未完㗎，佢要喺開飯前幫手抹枱同放餐具，記得自己細個時燒腩仔婆婆都會要求我哋幫手開枱，但我哋三兄妹次次推得就推唔願做，難得燒腩仔勁enjoy呢個小任務，或者佢認為呢D就係大個仔嘅表現掛，哈哈...
將D蛋皮回一回鑊，煮埋八爪魚腸仔同塊豬柳漢堡，呢碗蕃茄蛋碟頭飯就完成啦（勁hea碟頭飯:P），燒腩仔本身鐘意食蕃茄，再加埋今次有份幫手切蛋皮，呢餐飯佢食得異常地起勁呢﹗
鏡頭一轉又去咗第二日嘅下午，天氣又熱又焗又只得我哋兩母子開飯，真係諗到頭爆都唔知食咩好，口痕問燒腩仔想食咩，佢答艾菲話要食「凍嘅嘢」，終於靈機一觸畀艾菲諗到整吞拿魚三文治，由於呢日嘅朝早有事出咗去，所以無時間畀佢幫手整個沙律，但艾菲開飯前只係拎麵包同沙律出來，佢話咁快已經自動波將D沙律搽上麵包到再夾埋放落口食，仲好乖咁肯整多一份畀艾菲一齊食﹗
見佢咁鐘意食沙律，之後艾菲都同佢encore咗次整薯仔沙律，薯仔底當然係艾菲包辦，但剝雞蛋殼，切蛋，整碎D吞拿魚，唧沙律醬同最後撈埋呢D功夫艾菲都好放心交畀燒腩仔去做，整完就雪落雪櫃專登等埋米高返來先一齊食，等米高有機會試吓個仔嘅手勢，浮誇地讚賞吓佢畀多D信心佢，果然燒腩仔相當受落，仲好搞笑地寧願食沙律都唔願食個主菜fish filet添呀﹗
沒有留言:
張貼留言