四個月

其實...我兩星期前已經足四個月㗎啦，不過因為去完健康院，發現我兩個月以來都無乜點重過，直情嚴重到跌出生長線要轉介兒科，媽媽唔開心咗足足一個星期，再日以繼夜夜以繼日咁餵我飲奶，搞到個人勁攰就遲咗畀我出場囉...



自從我兩個幾月開始肯埋身食奶，我半埋身半餵樽到三個月之後，媽媽就索性唔泵奶畀我全埋身（艾菲：泵足兩個幾月後真係會對個泵產生恐懼症>.<），只係佢要出街先泵定160-200ml畀我（視乎泵到幾多就畀幾多），起初都可以照舊每日食五餐夜晚一覺瞓天光，不過自從我足100日後就晚晚要食多餐，成日搞到凌晨兩點幾三點食埋宵夜先肯瞓（艾菲：唔夠飽嘅徵兆？）。



媽媽話相對哥哥來講，我係屬於瞓得唔好同少，夜晚已經搞到凌晨兩三點先肯瞓，但有時朝早六七點就醒，然後到日頭又會唔願瞓晏覺，人哋話母乳寶寶特別好哄睡，我都會啜媽媽啜到瞓著，但一放我落床就會爆喊醒晒唔再瞓，反而出街嗰日就會瞓得多D，而且我唔係好肯啜奶咀，所以就令哄睡呢一樣嘢變得難上加難。



唔知關唔關轉咗全埋身食嘅事，我呢個月變得勁黐身，基本上除咗食飽奶一個鐘內心情大靚肯同人玩吓，其他時間都一定要媽媽抱實先安樂，佢一行開或交我畀人抱我就會扁咀繼而喪喊唔停，就連米高同湊開小朋友嘅婆婆都話搞我唔掂大叫頭痛。



但除咗黐媽之外，我依然係個開心寶寶來，媽媽話我貪玩又多咀，心情好時會好似哥哥當年咁，不停撩人講嘢，而今個月最大嘅進步係終於識笑到咔咔聲（上個月只係笑到一聲尖叫），同埋望見媽媽食嘢會有吞口水嘅反應。



活動能力喺呢個月又加強咗， 可能個人太輕盈所以已經成功轉到身，當然仲係時得時唔得啦，不過媽媽宜家放我喺high chair會扣返安全帶以策安全，勁鐘意食自己隻手，由初時食單邊拳頭，到一次過食兩邊拳頭，再進化到宜家食孖指，最經典一次係扭眼瞓時識得自己喺個口到拎返個奶咀出來，再塞隻手入口食到嗒嗒聲。



而且我已經唔甘於成日瞓喺到，媽媽間中會放我落去張bumbo chair到坐陣，通常坐到十分鐘唔嘈，仲識得追住D會郁嘅嘢來自娛，上次去健康院時姑娘同醫生同我做完檢查都話我條頸同腰夠力，來緊可以開始學坐耐D，出街亦可以轉向前面揹，等我望多D嘢。



呢個月開始無乜人話我似媽媽啦，大家都轉返軚話我似哥哥，不過媽媽又無意中搵到張神緒同佢細個差唔多嘅相來做拼圖喎，大家今次又點睇呀，哈哈...

~~~~~~~~~~~~~~~~~~~~~~~~~~~~~~~~~~~

跌出生長線之媽媽有話兒：

自從轉咗全埋身之後，BB豆豬明顯無之前咁長肉，艾菲都知佢係比之前用樽時食少咗，但見佢濕片夠晒（佢係超痾得），就一直無為意有問題，直至前一個星期去健康院磅重，發現佢兩個月只係重得兩安士，體重跌出生長線，連帶身長同頭圍都直線下降到勉強掂到3，艾菲簡直係晴天pig pig勁想喊，即時好內疚同自責，覺得係自己堅持埋身餵人奶害咗個女，好彩有米高撐住不停話唔覺得BB豆豬健康有問題，兼力勸艾菲唔好放棄人奶。

為咗呢件事艾菲分別同健康院姑娘，醫生，同聯合醫院兒科姑娘傾過，佢哋都無話叫艾菲補奶粉，仲提醒艾菲母乳係最吸收最適合BB豆豬嘅食物，不過健康院姑娘就建議艾菲由宜家五至六餐增加到餵八餐，聯合姑娘就提艾菲要食返多D嘢特別係澱粉質食物，等D奶有多D營養來谷返肥BB豆豬，然後綜合晒大家意見後，艾菲呢個幾星期就係不停食食食同餵餵餵，每日餵七至八餐奶，即平均兩個幾三個鐘就要餵一餐，堅係餵到天昏地暗。

雖然呢個追磅過程係辛苦到暈，艾菲直情feel到自己有變人乾嘅跡象，不過眼見BB豆豬喺短短個幾星期就重咗0.7磅（我哋為咗BB豆豬仲專登買咗個磅返屋企mon住佢嘅體重），個人望落明顯漲咗D，最重要係個人變得無之前咁忟憎，就連瞓著覺都識偷笑，艾菲就覺得犧牲吓休息時間同個肚腩都係值嘅，當然如果佢可以再瞓返好D同追返足磅就更好啦﹗