米高嘅兩個星期大假轉眼來到尾聲，但個天依然日日落雨，所以去玩都要諗D室內活動，見咁啱有D嘢想去沙田做，八月時博物館又免費入場，於是帶燒腩仔去文化博物館玩咗半日。
我哋先上樓上參觀，老實講呢D展品對艾菲來講係零吸引（皆因艾菲已經來過N次），但米高就睇得津津有味咁，起初以為燒腩仔會無耐性搞搞震，點知有過上次同爺爺去茶具文物館嘅經驗後，佢竟然識得話畀艾菲聽要慢慢睇，咁米高都有嘗試介紹吓，又叫佢幫手睇吓D展品係咩年份，叫做畀D嘢佢做啦。
行完一圈後我哋就帶咗佢去地下嘅兒童探知館玩，去到艾菲第一時間叫佢入去魚缸到玩，記得上次來時佢唔夠膽入，今次本來都驚驚地話唔入㗎，不過見到有個小朋友入去玩完好似好過癮咁，佢就終於衝破自己心理關口走入去玩。
之後上樓上畀佢認識吓唔同雀鳥嘅資料，然後叫佢砌返隻雀出來，估唔到佢又OK識分頭同翼，唔係亂咁來㗎喎，玩完再落返去睇吓農村生活同教吓佢咩叫考古。
到差不多時間，艾菲就放低佢兩父子喺到玩，自己同BB豆豬去育嬰室到開餐，不得不讚嘅係呢到除咗育嬰室夠大，D staff亦超好人，艾菲都未開口已經估到艾菲想去育嬰室，極速帶艾菲過去，聽到艾菲要餵母乳更加大讚「飲人奶好呀」，仲幫艾菲拉好個簾同閂好門先走，感覺超好呢﹗
餵完BB豆豬，艾菲就返去兒童探知館搵返燒腩仔父子，竟然見到佢哋玩緊飛行棋，明明早兩星期艾菲教燒腩仔玩時佢都唔係好明點玩㗎喎，但米高今次再教已經識玩，所以話呢...有D嘢係要爸爸教好過媽媽教嘅。
玩到大家都肚餓，我哋就走人返過沙田新城市廣場搵食，臨走時燒腩仔話要同李小龍影張相，仲出盡力去學佢踢腳添，不過就踢極都踢唔高隻腳囉，kakaka...
沒有留言:
張貼留言