燒腩仔人生中第一個正式放嘅暑假（上年得兩日嘅唔算啦），遇著BB豆豬啱啱出世，艾菲真係同唔到佢去邊，好彩得妹豬媽提醒，早喺入院生妹妹前就睇定屋企附近社區中心嘅暑假活動，入定紙抽籤，再喺坐月期間吩咐米高幫手報名，基於米高唔贊成個仔咁細個就去學學術嘢咁㖖苦，所以只係報咗非洲鼓同體操兩樣，叫做畀佢去玩吓消磨吓時間，唔使日日坐喺屋企咁悶。
每次上堂，艾菲都會一湊二同佢去社區中心，放低佢然後就同BB豆豬喺中心到坐一陣等佢放學，又每次都要就妹妹嘅飲奶時間，其實都幾趕急一落堂要即返屋企，難得有次妹妹等佢等到瞓著，於是艾菲爭取時間，帶咗佢去試樓下新開嘅甜品鋪，實行兩母子來個偽拍拖sweet一陣咁多啦﹗
除咗上暑期班之外，我哋幾乎日日都留喺屋企，然後無所事事咁一日就過去，每日艾菲都好想帶佢落街放吓電，但又唔知點解每日都好多嘢做抽唔到時間，千辛萬苦先夾到一日半日，可以帶燒腩仔落樓下平台踩吓scooter，又或者著齊雨褸水鞋落去踩水氹，明顯睇得出佢係好enjoy㗎，所以艾菲真係要提醒自己，來緊日子要多D帶佢出去放電先得。
而另一個暑假期間，艾菲帶得佢哋去最多嘅地方，就係返自己娘家啦，返到去有燒腩仔公公婆婆幫艾菲手湊BB豆豬，燒腩仔又有表妹陪佢一齊玩，睇住佢兩個由暑假初時各有各玩，到暑假完結時開始識鬧交（但轉頭又friend返），感覺真係幾神奇。
亦由於BB豆豬當時仲未好認人同黐身，所以每次艾菲都會趁黃昏時間無咁熱，帶燒腩仔同表妹一齊去公園玩放吓電，探吓娘家條古董長滑梯同爬吓蝸牛，但印象最深刻係一向唔多理表妹嘅燒腩仔，有次見到班小朋友衝埋表妹附近，即衝埋去拖實表妹（表妹上落樓梯未係好叻），直至班小朋友走咗先放手，嘩﹗Man到呢﹗唔怪得佢喺學校咁受同學仔同姨姨歡迎啦﹗kakaka...
沒有留言:
張貼留言