燒腩仔放暑假之TsumTsum體驗

無去迪士尼一排，燒腩仔對米奇嘅熱情依然，耐唔中會叫艾菲推BB車帶妹妹同佢去迪士尼（艾菲之前同佢解釋妹妹細所以暫時唔同佢去迪士尼住，佢就不停諗方法解決呢個問題），眼見八月初一連幾日落雨唔停，連樓下公園都去唔到，於是醒起不如帶佢去又一城睇Tsum Tsum，果然有人一去到即嘩嘩聲，發現D裝置識郁更加係唔肯走話要逐個等佢轉。



見呢個最靚嘅鐘樓無乜人排即埋去影，好開心後面位幫手揸機嘅姐姐好有心機，要知道小朋友宜家呢個年紀，要影一張正正常常嘅一家四口相實在得來不易呢﹗



講到口水乾，燒腩仔先信艾菲講樓上有車玩，肯跟我哋坐電梯上去。



然後就喺呢個位玩咗勁耐火車都唔肯走，艾菲眼見佢側邊嘅小朋友都換咗幾批，佢仍然無走人嘅意慾，如果你做其他嘢都有咁專注就好啦...



好彩艾菲一早叫米高去搵位食飯，成功拉走燒腩仔後就可以直入餐廳，兩兄妹齊齊望住溜冰場開餐，不過燒腩仔呢排出街食正餐食得好差，唔係嫌呢樣就嫌嗰樣，呢晚求其食咗塊仔pizza就話唔食，我哋已經採取放棄態度，見佢每餐有嘢落肚就算無謂勞氣。



呢頭唔願食正餐，轉頭艾菲去搵哈根大師食飯後甜品佢又走來強搶喎，真係畀佢激死﹗>.<



食飽喺商場逛個圈，臨走呢個小朋友又嘈住要等D Tsum Tsum裝置轉，咁啱見到近火車站個位都有D Tsum Tsum影，即拉佢埋去轉移視線再急急腳走。