除咗踩單車之外，另一個好想喺呢個暑假去嘅地方就係長洲，艾菲同米高N年無去過長洲，聽聞多咗好多好嘢食，諗起就流晒口水，但weekend去實係逼爆，只好留返平日放假去，悠悠閒閒咁漫遊，咁先似係遊離島㗎嘛﹗
已經晨早起身準備出門口，但唔知點解都要搞到十一點幾先去到碼頭，好彩有架快船半個鐘即到，啱啱好夠時間喺船上餵飽BB豆豬， 至於交通工具控燒腩仔，有得坐咁大架船就開心，全程船把口幾乎無停過。
一落船，第一時間去搵食，米高跟openrice推介去咗間叫喜姐小食嘅餐廳，試咗佢個豬扒包，層層疊西多士同炸南乳雞翼，係就係幾好味嘅，不過又未至於要一再回味嗰種囉。
食完我哋就向住東灣方向行，點知少爺兵燒腩仔行唔夠五分鐘已經周身R，發晒忟咁又話熱又話痕，唯有買個冰哈蜜瓜過佢冷靜吓，為食嘅艾菲當然都好順手買件冰水蜜桃一齊食啦，夏日炎炎食冰水果堅係爽爽爽呀﹗
路過愛情瑣個位，點都影返張到此一遊，艾菲就剩機閃咗去買個紅豆餅食，而唔食豆嘅燒腩仔對佢係零興趣㗎﹗
燒腩仔來遠見到沙灘，即同艾菲講「我要落去游水呀」，完全無理有無帶泳衣，其實出發前都同米高傾過，我哋帶住BB豆豬同行都好難落水游，所以只係帶多套衫預佢玩吓水就算。
見佢玩水玩到癲晒，艾菲就教佢執吓貝殻平伏吓心情，然後只係做咗陣跟得媽媽艾菲就閃人啦﹗
喺太陽下陪玩D咁粗勞嘅工作當然係交返畀米高啦，而艾菲就留喺陰涼位置睇住BB豆豬，順便捉吓小精靈升吓呢咁，哈哈...又估唔到小小嘅長洲有咁多個pokestop㗎喎，連道館都有四五個。
玩咗一個鐘左右我哋就同佢換衫走人，轉場去咗長洲體育館，兵分兩路，米高同燒腩仔去playroom玩，艾菲同BB豆豬去飲奶，不過呢到原來只得換片板無育嬰室，但職員都好好咁建議艾菲去更衣室餵，環境OK只係入面咩訊號都接收唔到捉唔到精靈好悶囉...
餵飽BB豆豬艾菲就接力陪燒腩仔玩，原來呢到嘅playroom係充滿長洲風情，有得扮搶包山又有得扮玩風帆，最正係有滑梯同呢架路軌車玩，玩到燒腩仔唔捨得走。
玩夠我哋就沿路行返出去，邊行邊掃街食到無停口，先來串薯片串同芒果糯米糍。
跟住有長洲必食嘅甘水泰大魚蛋，艾菲口痕買多串魚肉釀豆卜來食，鏡頭外仲有N咁多杯消暑果汁，Yummy!
飲飽食醉後，最好當然係坐喺海邊，吹住海風睇日落啦，坐到懶鬼燒腩仔唔願行呢。
臨走試埋炸芒果糯米糍，外脆內冷都幾得意，另外再外賣個平安包返屋企食，不過味道就只係一般。
走嘅時候坐大船，艾菲仲一心以為可以見識吓新渡輪新設嘅船上育嬰室，點知...上到船搵來搵去都搵唔到，問船員先知唔係架架大船都有（吓？咁D媽媽點夾時間餵奶？），無嘢做唯有改帶燒腩仔去船尾望海浪漫吓，點知呢個怕死嘅小朋友不停喊驚，勉強畀艾菲影咗張相就急急腳走人。>.<
沒有留言:
張貼留言