燒腩仔放暑假之爺爺去哪兒

呢個暑假艾菲忙住湊BB豆豬，唔係好帶到燒腩仔出去玩，好彩仲有超錫燒腩仔嘅爺爺，喺燒腩仔放暑假前一星期，提出暑假帶燒腩仔去玩嘅建議，然後佢哋兩爺孫每隔一至兩星期就出去玩半日，爺爺有得享受湊孫樂，燒腩仔有得出去放電，艾菲就輕輕鬆鬆同BB豆豬單對單，真係一舉三得嘅安排﹗



第一次出去玩，其實艾菲都有少少唔放心，皆因燒腩仔平日擺明蝦爺爺，驚爺爺鎮壓唔住佢，不過返到來都無穿無爛，而且爺爺會間中whatsapp返D相返來，等我哋知道燒腩仔搞緊咩（呢個超讚），艾菲即時放心好多。

明明約去玩時燒腩仔只係話去樓下新開嘅公園，點知爺爺就帶咗佢去遊車河，過海兼去埋香港公園，sir滑梯玩沙睇魚睇雀之餘，仲呃爺爺請佢食甜筒（當時佢有D咳未清要戒食凍嘢，但佢忍到爺爺買咗先咳>.<），真係爽到呢...



第二次出去，爺爺本來想帶佢去第二到玩，點知燒腩仔好堅持要去返香港公園，超鍚佢嘅爺爺又點會say no，於是爺爺除咗帶佢去公園，仲有帶佢去埋上次無去到嘅茶具文物館，事後聽燒腩仔講返爺爺應該有同佢講解吓（good﹗），之後好似係帶咗佢去中環坐叮叮去堅尼地城再轉巴士返屋企，氹得燒腩仔呢個車迷不知幾開心。



第三次出去，米高事前同燒腩仔講明唔好再去香港公園（因為佢知個仔百去不厭，但大人就肯定去到悶），於是爺爺就帶咗佢去九龍公園玩，呢到我哋帶過燒腩仔去兩次，但兩次都只係去遊樂場同麥當勞，今次爺爺終於帶埋佢去睇雀。



之後仲帶咗佢去The One睇小丸子（唔係爺爺帶佢去艾菲都唔知有小丸子），同中港城影海豚，呢D都係我哋平日好少會帶燒腩仔去嘅地方來﹗



第四次出去，遇著落雨天，爺爺本身想帶佢去科學館，點知遇著一班強國小朋友鴨仔團，爺爺見勢色唔對走為上著，轉戰星光大道，去咗睇麥兜（唔知點解佢會識）同李小龍。



返到屋企，燒腩仔仲同艾菲講佢同咗劉德華影相，艾菲當時心諗你點會識劉德華呀，好自然就問佢劉德華靚唔靚仔，然後講咗一大輪先發現佢只係同劉華個掌印影相，後尾就喺爺爺facebook見到呢張相，仲寫住「倆爺孫打印！」，sweet到呢...



之後佢哋仲去咗1881睇呢部古董消防車添，艾菲初時唔知邊到來，猛問燒腩仔都只得「咪喺地鐵站附近嗰到囉」（即係邊到？）嘅答案，後尾見埋雪糕張相先估到。

眼見燒腩仔有得跟住爺爺四圍去玩咁開心，艾菲真係好感恩燒腩仔有個咁錫佢嘅爺爺，亦希望呢個小朋友大個之後會記得呢段回憶（所以要特登blog起佢），識得孝順返爺爺轉頭啦﹗