燒腩仔放暑假之Let's get wet

燒腩仔放暑假遇著BB豆豬啱啱出世，艾菲自問真係無能為力一湊二帶佢四圍玩，就連落樓下公園都有D難度，但日日困喺屋企莫講話燒腩仔，連艾菲都怕會坐到發霉，所以一到weekend米高放假，艾菲就會極力爭取帶燒腩仔出去玩吓透吓氣，但之前要顧住泵奶畀BB豆豬，每次出門都要限時限刻唔去得遠，見BB豆豬上個月開始肯埋身食奶，我哋終於可以去遠D玩耐D，然後上個月底就一家四口去啟德郵輪碼頭玩咗半日。



我哋喺屋企食完午餐先出發去玩，不過下午兩三點嘅郵輪碼頭依然係好熱好焗，怕熱嘅燒腩仔一去到就呆呆咁，好彩艾菲早有準備帶定枝bubble去畀佢warm up。



開始有笑容啦...



Let's get wet!



繼第一次只用手玩，第二次用腳踩之後，今次又有新玩法，就係拎個膠樽去裝水。



裝滿水就即刻走去隔離D草叢到淋花。



淋完咪又再裝過囉，短短一個鐘入面都唔知重複咗呢套動作幾多次... >.<



裝到D水彈到一面都係都無有怕。



無心插柳嘅一吓㩒錯快門，正是艾菲最喜歡嘅一張。



米高怕個仔熱，專登用保溫水樽裝咗D冰去整冰水畀佢飲，睇佢個樣就知正啦﹗

至於BB豆豬都無執輪㗎，一去到就跟艾菲去育嬰室歎住冷氣飲奶（全個公園連廁所都熱到爆炸，唯獨育嬰室有冷氣﹗），出來就全程有米高抱住發呆。

玩完水換好衫再去草地跑吓，不過D蟻唔知點解係咁爬上燒腩仔個身到，所以跑咗幾分鐘即閃。

臨走前諗住玩多陣泡泡，點知心急嘅燒腩仔搶住自己開，結果唔小心成枝倒瀉晒咁滯，好彩米高用僅餘嘅丁丁泡泡水都吹到咁多波出來，燒腩仔先無發我哋脾氣。

仲玩到癲晒勁hyper，真心艾菲都好耐無試過玩得咁free咁盡慶啦﹗