自從燒腩仔識玩scooter之後，已經好耐無踩過屋企架BB三輪車，隨住佢個身型越來越大，我哋都知佢係時候升呢去踩真嘅單車，直至佢有日路過反斗城，忽然好堅持咁同艾菲講「我真係識踩㗎」，要艾菲畀佢坐上架單車到試玩，艾菲就知唔可以再呃佢幾耐，但基於屋企地方始終有限，附近又無單車場或單車徑，艾菲同米高早有共識唔會買車，要踩就去單車鋪租，所以呢日同佢去咗香港單車館，一圓佢踩單車嘅心願。
呢到租小童單車，$30一個鐘，$100一日，不過燒腩仔第一次踩，加上呢日天氣一直麻麻地（好彩屋企有個地下天文台長，我哋趁停雨拿拿聲去搏一搏，台長話呢日唔踩之後日日都狂風大驟雨更加唔使踩）， 最後只係租咗兩個鐘。
起初同佢喺單車館門口兜吓細圈，估唔到佢都pick up得幾快，只係跌咗兩三次已經識控制架車。
之後同佢偷雞踩入公園兜大圈（公園入面好似係唔可以踩單車），睇佢踩到笑晒口就知佢好滿意架車啦﹗
話咁快已經越踩越快，追到我哋出晒汗，只係見到佢嘅背影。
踩完單車米高仲帶咗佢去坑口食小丸子同炸雞做下午茶，飲埋杯沙冰，大滿足啦﹗
呢日咁順利一定要特別鳴謝好合作嘅BB豆豬，全程唔係食就瞓乖乖無扭計，我哋先可以玩得咁開心咋﹗
沒有留言:
張貼留言