第四次物理治療：
因為知道呢次會換新姑娘，米高又話唔係太方便請假，最終坐月中嘅艾菲決定自己跟返，偷走同燒腩仔去物理治療，順便同呢個仔拍吓拖氹吓佢開心。
第一次見新姑娘，燒腩仔表現尚可，亦明顯新姑娘比較識同小朋友相處，同燒腩仔溝通得比較好，例牌都係叫佢做單腳跳，雙腳跳，跳彈床，同撩圈圈呢D嘢，相對上次嘅表現明顯係有進步。
姑娘見佢OK，跟手就畀佢試行平衡木，估唔到第一次行嘅燒腩仔好OK，姑娘見佢行得悶悶地就畀個任務佢，要佢由平衡木嘅一邊運圈圈去另一邊，佢都完成得到仲玩得好開心。
臨走前姑娘話佢雙腳跳同單腳跳都合格，叫艾菲返去多D同燒腩仔練習腳貼腳（前後）咁行，目標係令佢喺四歲時行到四寸闊嗰種平衡木。
第五次物理治療：
呢次艾菲終於坐完月，米高又話請到半日假過來幫手，咁艾菲就一湊二咁帶燒腩仔去診所會合米高，一心諗住有米高睇住，可以同BB豆豬坐埋一邊望吓就算。
一去到姑娘先同燒腩仔做雙腳跳同單腳跳，再安排燒腩仔跳十分鐘彈床，喺艾菲同米高嘅督促下總算順利完成，之後姑娘就叫佢玩撩圈圈，明顯越做越順表現良好。
之後姑娘就教佢拋波波，畀咗一桶波波池D膠波佢，向住個窿拋過去，起初佢都係掟嘅多，但喺米高嘅幫忙下，都慢慢掌握到拋同掟嘅分別。
拋完波姑娘就畀咗個大size嘅波佢向住彈床掟，要佢學埋接波呢個動作，睇得出佢係做到，只係衰在唔專心同心急，我哋唯有不停喺側邊叫佢冷靜，教佢做好接嘅準備，數咗123先掟，最後總算成功完成到。
最後姑娘就叫佢去行平衡木，艾菲見差唔多時間就問姑娘借咗間房來泵奶，搞掂出返來米高已經話走得，話姑娘無特別嘢講喎... >.<
第六次物理治療：
呢次米高請到一日假，可以一家四口一齊出發，照例都係米高主力陪佢，艾菲同BB豆豬喺側邊打氣，一心諗住之前兩次表現都唔差嘅燒腩仔OK，所以出門口前無特別提佢要乖，點知呢日唔知做咩上咗身咁，叫佢做咩就偏唔做咩，自己喺到自由活動完全唔跟指示，要艾菲不停出聲鎮壓先好些少。
今次姑娘都係先安排燒腩仔跳彈床，再做撩圈圈，講晒數較晒計時器先做得完，然後到拋波波時佢擺明亂拋，再爬入個窿到話要執波來拖延時間，到練接波時更加係專登掟去第二到，再跑去D危險位到執，艾菲同佢講咗好多次數先終於完成到以上動作，呼～
最後又係行平衡木，姑娘見佢行得OK，於是加咗兩個障礙物要佢跨過去，估唔到佢都順利行到無問題，姑娘本來叫佢去試吓行埋窄D嗰種平衡木，但佢話唔想所以無行。
今次艾菲主動捉住姑娘傾，問佢點解做咗咁多次物理治療，雙腳跳單腳跳都已經做到無問題，燒腩仔到宜家仲係成日跌，尤其係喺屋企呢個咁熟悉嘅地方跌，然後姑娘就解釋佢最大嘅問題係唔專心，行路時成日分心去望或理其他嘢，所以特別易出意外囉...
對於姑娘嘅comment，其實艾菲都好認同，有時見到佢跌真係好忟，日日喺屋企橫衝直撞，唔係無端端喺high chair上落時跌落地，就係踢到把座地風扇或者房門喺到喊痛，點解就係唔可以放慢腳步慢慢行，用心留意下腳邊有咩障礙物呢？唉...
沒有留言:
張貼留言