三個月

真係眨一眨眼我就三個月大啦﹗媽媽話我呢個月好似無肥得咁勁，節瓜腳依然但D肉明顯無上兩個月咁實淨，所以叫爸爸幫手將我變做圓眼圓咀圓面喎...媽媽你玩我咋嘛...



我宜家一日食五餐，繼續做全人奶B，三個半至四個鐘食一餐，頭四餐全部埋身食，只係最後一餐用樽餵160ml，爸爸話等我夜晚食飽D一覺瞓天光，佢又可以餵吓我咁啦，不過可能慣咗埋身食，家陣就連飲樽都會側住條頸，對住爸爸個心口飲，搞到狂畀媽媽笑我傻豬，而嘔奶嘅情況亦隨住轉返埋身食而明顯改善咗，但唔知係唔係埋身食個量飲少咗，D肉無之前咁實，濕片都無之前咁爆咁多（不過個數都係合格嘅）。



除咗成功轉返埋身食之外，呢個月另一樣叻豬嘢就係成功戒埋夜奶，宜家十一點幾食完最後一餐奶之後，可以一覺瞓到八點幾九點先再食，不過簡中會食完奶唔願瞓，搞到凌晨兩點幾，媽媽頂唔住就塞我埋身食多餐宵夜來整暈我。



生活習慣開始穩定，朝早食完第一餐奶會即刻再瞓等媽媽有得補吓眠，之後幾餐都係食飽玩陣就瞓，多數扭眼瞓時可以咬住奶咀自己瞓唔使媽媽暗（夜晚除外），不過瞓醒又未夠鐘食奶時，就會比較扭要黐人要人抱囉。



名乎其實嘅開心寶寶，就連瞓著覺都識笑，飲完奶同poo poo完時心情最靚，開始玩口水玩到一咀都係，已經識得同人玩，你同我講嘢我除咗識得「un」一聲咁應你之外，仲會自己笑到尖叫一聲來引大家主意，最鐘意同哥哥玩，佢一講嘢我就會望住佢笑。



已經開始玩baby gym，仲識得郁手去搞D玩具，條頸越來越有力，tummy time時可以撐起頭仔一段時間，亦可以墊住cushion坐到一陣，至於對腳同腰都好好力，發忟時可以扭到反起半個身。



媽媽話我宜家大個女啦，唔使再日日著住D初生袍仔，天氣咁熱可以試吓著裙仔，露吓脾吸吓睛喎，但著完一大輪又話人帶埋夾都成個男仔咁，好彩婆婆發現到我D眼睫毛好長，遲吓留長埋D頭髮就會lady D㗎啦﹗



由出世到宜家，最多人話我似哥哥，但最近又多咗人話我似媽媽喎，於是媽媽就搵咗佢細個D相出來做比較，嘻...我哋兩母女似唔似樣呀？