海底奇兵2之其實明唔明？

BB豆豬出世前，艾菲已經不停同自己講，幾忙都要盡量抽時間同燒腩仔拍拖，等佢做咗哥哥仍然可以有獨霸媽媽嘅時光，奈何艾菲平日自己一湊二，要同燒腩仔拍拖又談何容易，咁啱早兩星期米高請咗全日假來陪燒腩仔去做物理治療，艾菲見樓下戲院早場《海底奇兵2》嘅時間啱啱好，可以餵完BB豆豬即出發，再睇完返上樓同佢沖涼加餵第二餐奶先去物理治療，就情商米高朝早幫手睇住BB豆豬一陣來成全我哋（其實都只係陪佢一齊大覺瞓之嘛）。

有過上次《功夫熊貓》嘅經驗，艾菲今次專登買定《海底奇兵》隻DVD返來，畀燒腩仔睇咗兩次，仲要佢嘗試講返戲情出來，make sure佢係知道第一集講咩同認得D主角，先應承帶佢去睇，點知一開場播《冰河世紀》同《麥兜．飯寶奇兵》嘅trailer，佢又係咁喊驚（連麥兜都驚？），艾菲只好叫佢驚就合埋眼唔好睇。

跟住到開場，無做功課嘅艾菲一心諗住個故事好似第一集咁簡單，睇落先知會不停時空穿梭講返多莉細個嘅情景，然後專注力其差嘅燒腩仔，應該都唔係睇得好明，所以全程不停喺側邊喊驚喊凍喊痕，煩到艾菲要用盡方法安撫佢，先終於睇得完成套戲，兼坐到完晒場聽晒歌睇埋最後嘅一幕（好彩朋友事前提醒，因為職員開晒燈D人以為無嘢睇走晒，無乜人知道要留底睇到最尾）。

不過當你以為佢睇唔明嘅時候，到散場行出戲院時傾偈，佢又講得出部分情節㗎喎，例如講到多莉叫阿亨做七爪魚，多莉同莎莎妹喺水管傾偈，多莉媽媽最鐘意紫色貝殼，同八爪魚有三個心臟之類，接收能力比艾菲想像中高。


仲從此愛上一切海底奇兵嘅產品，每次行街見到一定拉艾菲埋去睇兼嘈住話想要，忘形到連至愛嘅McQueen產品都望唔到，但實際型嘅艾菲當然唔會亂買無謂嘢，唯獨呢幅無意中喺HMV見到嘅立體砌圖，見幾靚又可以訓練到佢專注力，重點係一D都唔貴（$35一盒咋﹗），同另一本有埋故事內容嘅填色冊，先入到艾菲家門。