燒腩仔放暑假之跟住媽媽學畫畫

艾菲同米高都係無咩藝術天份嘅人，而呢樣嘢亦好順利成章地遺傳咗畀燒腩仔，佢係睇得出嘅對畫畫零興趣，到宜家填色仲係無心機油到出晒界，但唔鐘意還唔鐘意，事實係佢來緊返學讀書係避無可避，所以艾菲趁住暑假有多D時間喺屋企，就用自己僅有嘅丁丁藝術氣質，點都同佢一齊練習吓。



我哋嘅第一份習作，就係之前大爺媽介紹，最簡單唔使點用腦諗嘅數字油畫，艾菲學大爺媽咁畫咗界之後就交畀燒腩仔上色，以為佢會搞得掂，點知...佢油到連長頸鹿個鼻窿都唔見埋...



由於燒腩仔實在無乜天份，再加上艾菲要同時兼顧BB豆豬，所以幅畫用咗兩日時間先完成到，大家睇到幅畫嘅右邊一撻撻白色未油好嗎？艾菲問咗燒腩仔幾次，佢都堅持自己已經完成，艾菲唯有無奈接受。



等到夜瀾人靜燒腩仔同BB豆豬都瞓晒，艾菲走返出廳望吓幅畫，掙扎咗好耐好耐，實在忍唔住自己郁手幫佢填返D白色位，唔...親子油畫嘛，由艾菲做結尾補靚佢無問題嘅（自我催眠mode）。



第二樣習作係樹葉拓印，燒腩仔嫲嫲喺暑假時去咗加拿大探親，艾菲就請佢執幾塊楓葉返來送畀燒腩仔做手信，然後嫲嫲一返香港即速遞咗三塊楓葉畀我哋，為咗唔好浪費嫲嫲嘅一番心意，艾菲就即刻抽時間同燒腩仔開工。



第一次整，艾菲用最簡單嘅方法，就咁將塊楓葉放底，然後叫燒腩仔喺紙上面掃返塊葉嘅型出來，不過艾菲示範同講咗好耐，燒腩仔都係似明非明咁，不停用死力畫落紙到，搞咗好耐先整到兩張比較似樣。>.<



第三樣練習都係樹葉拓印，眼見幾塊楓葉都時日無多，艾菲今次就索性教燒腩仔將顏料填滿塊葉，再反轉印落畫紙到，可能學校都有做過類似嘅勞作，今次佢掌握得比艾菲想像中好。



毫無創意可言，純粹聽艾菲指令來做，不過印出來都清楚望到葉嘅形狀同葉脈，艾菲已經收貨㗎啦﹗