燒腩仔放暑假之跟住媽媽練小手肌

燒腩仔係年尾細B，加埋本身懶底經常動口不動手，所以小手肌發展一直都麻麻，簡單如開包動物餅食，佢都成日嗌住開唔到想我哋幫，不過來緊K2要開始寫字，既然呢個暑假日日喺屋企無嘢好做，一於安排D小任務畀佢鍛練吓小手肌，又等艾菲可以free到對手出來做吓家務，兼唔使擔心有人整醒BB豆豬搞亂檔。



第一個要佢做嘅任務就係學用鉸剪剪嘢，其實K1時學校已經有功課要佢哋剪D圖案出來完成，不過安全鉸剪（又係青衣間zakkaya買$12把）無咁利加紙質差嘅關係，十次有十一次佢都係剪到張紙梅晒剪唔開，之前試過拎D A4紙畫線畀佢剪，但感覺好浪費紙張唔環保，所以今次就搵咗堆唔要嘅傳單出來畀佢慢慢剪。



先剪最簡單嘅直線，再開始要佢剪格仔，由於傳單嘅紙質較為硬身，所以今次佢無再話剪唔到啦。



見佢剪直線都OK，就叫佢剪圖案，要求唔可以太高，只要D圖案無爛艾菲都收貨，剪完仲同佢一齊扮食pizza，就係咁我哋就消耗咗一個朝早啦﹗



鍛練小手肌另一樣好物係泥膠，既然燒腩仔有的是時間，艾菲當然係叫佢自己泥膠自己做，艾菲量好材料之後就開工啦﹗



整泥膠首先要將麵粉，鹽，水同油撈勻，呢個咁簡單嘅任務當然係交畀燒腩仔自己來，之後就由艾菲開火將混合物煮到變泥膠。



攤凍後艾菲就將泥膠交返畀燒腩仔進行最後上色嘅部分，先叫佢將泥膠平均切成三份搓圓，再滴D食用色素落去搓勻。



起初燒腩仔不停叫住「做唔到」想艾菲幫忙，不過艾菲實在太了解佢嘅為人，所以堅持要佢試咗先，真係唔得先搵幫手，結果搓吓搓吓咪自己完成咗囉﹗



搓完當然第一時間拎來玩啦﹗佢跟住就玩咗足足兩日，第一日啱啱搓好時D泥膠嘅質感係最好，到第二日已經開始有D黐手（應該關我哋屋企比較濕事），放到第三第四日基本上已經黐到玩唔到，到第五日已經變咗要丟（所以最好用過期麵粉來做），好彩小朋友著重嘅係過程唔係成果。