五個月

Hi! 我伍小姐五個月大啦﹗媽媽話呢個月堅係過得唔容易，皆因日餵夜餵兼要日日睇住個磅做人，基本上佢無乜邊覺係瞓到超過四個鐘，但睇見我個身型慢慢吹漲返，體重喺一個月內急升1.7磅，仲差0.4磅就去到五個月大3嗰條成長線（艾菲：唔...0.4磅真係wee/poo少一次可能已經喺到，照計應該都當達標㗎啦呵...），宜家總算安心返些少。



難得爸爸咁支持，媽媽呢個月都係繼續全人奶餵我，仲係全埋身放題任食嗰隻，短短一個月內我已經由一日食五至六餐，進展到宜家一日食足九餐，每次大概十五至二十分鐘啜晒兩邊就放口，情深款款咁望住媽媽傻笑，雖然一直追唔足磅，但條腿都算肥美㗎﹗



瞓覺依然係我嘅弱項，媽媽話我好心野，成日八八卦卦唔願瞓，而且唔肯食奶咀，兼成日一落床就反身趴喺到瞓唔好，好多時搞到要啜住媽媽來瞓，或者出街揹住先肯瞓，但對比上個月來講已經好咗D，瞓覺時間算係穩定咗同長咗，可能係個人食得飽咗唔使再蘿蘿攣有件事掛，宜家每晚十二點半左右就瞓，朝早五點同八點起身食夜奶同朝早奶，但會極速瞓返到十一點先起身，然後等哥哥返咗學我下午兩點會再瞓到四點起身，之後夜晚多數會再瞓多一陣，不過好多時只係瞓到半個鐘就會「被嘈醒」>.<。



上個月好嚴重嘅黐媽症，隨住呢個月食多咗奶之後明顯有所改善，宜家至愛依然係媽媽，媽媽行開會成日四圍望去搵佢，不過都肯跟吓其他人，唔再一抱即爆喊，特別係同哥哥多咗互動，開始識得畀反應佢等佢無咁悶，簡中又會肯自己一個玩陣，等媽媽可以抖吓氣做吓其他嘢。



繼續做開心寶寶，好多口水成日撩人講嘢，高興時會無端端自己尖叫一聲，而且笑點越來越低，基本上只要feel到你係引緊我笑，都會好畀面咁笑畀你睇，亦開始識留意身邊環境同所發生嘅事，已經識玩peekapoo，見到大人食嘢又會好專注咁望住然後自己喪吞口水（艾菲：為食妹？希望佢有哥哥咁食得啦﹗）。



活動能力越來越強，宜家玩baby gym識自己出手拉D玩具來玩，反身或趴喺到都變得毫無難道，腳仔亦好有力扶住識撐直成個人企一陣，開始有少少想向後爬嘅意慾，基本上放我喺playmat到一陣，轉頭我就會碌咗去另一邊，得閒無事就會啜手指啜到嗒嗒聲，唔like奶咀但好buy牙膠，仲會食到成手口水好肉緊咁嘅樣。



不過唔知係唔係呢排D病菌太勁呢，我呢兩日有少少鼻塞同流鼻水（應該係畀哥哥傳染到），但好彩情況唔係好嚴重，媽媽同我噴吓鼻，再自己啪杯康鈣C喺餵奶時過畀我，我就好快無事唔使睇醫生食藥啦﹗YEAH!